LADC ah Chairman thar thlan a ni a, CEM Pu N.Zangura'n fiahna a paltlang.

Lai Autonomous District Council,Chairman atan Pu VL.Hmuaka thlan a ni a, Chief Executive Member Pu N.Zangura'n thlawptu neingah tawkin, fiahna a paltlang.

Vawiin a LADC Session Hall, Lawngtlai a LADC Session, chawhma lamah Protem Chairman Pu Lalthanmawia Colney kaihhruaiah Chairman thlanna neih niin, United Democratic Alliance atang a hming pelut, Lawngtlai Vengpui bialtu MDC, Pu VL.Hmuaka chu chuhtu awmlovin Chairman ah thlantlin a nih thu Protem Chairman in a puanga, hemi hnu hian Chairman thar hian a thutna a luah nghal.

Chairman thar Pu VL.Hmuaka kaihhruaina hnuaiah vawiin chawhnu dar 2 khan Chief Executive Member, Pu N.Zangura'n thlawptu a neihdan House ah fiah a ni a, CEM thlawp lamah Member 14 in ban pharin, thlawplo.lamah Member 5 in ban an phar a, Chairman Pu VL.Hmuaka chuan Pu N.Zangura CEM chuan fiahna a paltlang thu a puang.

CEM chuan LADC a Sorkar mumallo vanga nasataka tawrhna karah, fiahna a paltlang thei chu Pathian remruat a ni tih sawiin, Member te chungah lawmthu a sawi a.

A kaihhruai Sorkar chuan diktakin rorelna kalpui an tum tih sawiin, Sum harsa leh indaihlohna nasatak karah, a nihdan tur taka sum hman a pawimawh thu a sawi a, LADC hnuaia Officer leh thawktu dangte pawh, Sorkar thatak din a nihtheih nan an hmazawnah thahnemngai taka thawkturin a chah.

CEM chuan Sorkar chu Ram leh hnam tan ke a.pen a ngaia, helam hawia hmalakna ah thiah ngai thiata, siamthar ngai siamthar kawngah a kaihhruai Sorkar chuan hma a lak tur thu a sawi bawk.