May 30, Zirtawpni zan dar 10:30 vel a Lawngtlai Bazar Veng leh Chandmary Veng a In dinglai panga leh Inrellai pahnih chima bungruate senghawi hna chu vawiin khan thawhtan a ni.
Pi Vanlalhlupuii Fanai In Bazar Veng a mi, Gelaed Drop-in-Centre leh Hotel leh mimalin an luah, Hotel a thleng zing a mi, Inchim kara tang mi pathum te chu, Inchim zan Zirtawp zan khan pakhat chhanchhuah niin, nimin Inrinni chawhma dar 10 khan pakhat chhanchhuah leh niin, nizan Inrinni zan dar 7:50 khan Inchim kara tang chhanchhuah hnuhungber chu lakchhuah niin, vanneihthlak takin Inchim ah hian nunna chan an awmlo.
Lawngtlai DC ruahmanna hnuaiah nimin Inrinni khan Inchim kara tangte chhanchhuah hna thawh chhunzawm niin, himtaka chhanchhuahkim an nih hnu ah nizan khan a theih ang angin bungrua senghawi hna thawhzui a ni a, vawiin Pathianni hian a nawlpuiin bungrua senghawi hna chu Veng pahnih ah hian chhunzawm niin, ruah a sur deuhreng vangte, Inchim hi la che leh maithei dinhmun a dingte a awm nual vangin bungrua senghawi hna pawh hi thawhchak hleihtheih a nilo.
Bazar Veng leh Chandmary Veng hruaitute chuan Inchim vanga National Highway-02 ping mek chu sialtlang theihhun tur an sawithei lova, bungrua a theih ang ang senghawi zawh phawt loh chuan kawngpui sialtlang mai theih a nihloh thu an sawi.
Zirtawp zan a Inchim vang hian Bazar Veng ah chhungkua sawm vel chu hmunhim lamah sawn an ni a, Chandmary Veng ah pawh chhungkua 15 vel hmunhim lamah sawn an ni bawk.
Inchimte hi Bazar Veng ah RCC Building pathum Pi Vanlalhlupuii Fanai In, Pu B.Vanhnuailiana In leh Pu Lalchungnunga te In niin, Chandmary Veng a Inchimte hi Pi C.Nihluani In RCC leh Pu Malsawma In Assam Type bakah Pi F.Rothuama leh Pu F. Lalnithanga te In rellai RCC ve ve niin, vanneihthlak takin Inchim vang hian nunna chan an awmlo. Inchimna lai hian Bazar Veng leh Chandmary Inrinna, Kawngpui an chhaklam niin, helai phei a Inrellai pahnih telin In paruk chimin, Chandmary Veng lama Kawngpui ana Inchimna chhak lam a Assam type pakhat chu a chim tel bawk.
Inchim vanga chhanchhuah ngai leh chhawmdawl hna hi Central YLA ruahmanna in Branch YLA ruatbikten a inchhawkin an thawk a, Inchim kara tang chhanchhuahna ah 3rd IR Batallion, Thingkah a SDRF leh Quick Response Team Lawngtlai District bakah YLA Member, chhanchhuah hna thawk tura tawnhriat leh zirna lo nei tawh ten an thawk.
Veng pahnih hruaitute chuan an vengin vanduaina an tawh ah an mahni lainata an theihna kawng hrang hranga puitute chungah lawmthu an sawi a, Sorkar thuneitute leh Central YLA hruaituten ruahmanna siam ngai an theihtawp an chhuahna ah lawmthu an sawi bawk.
Tags
News