Nimin lam aiin nizan leh vawiin lam ah Lawngtlai District ah ruah a sur tlem deuh a, Lawngtlai pawhtu kawngte chu leimin leh thingtlu vanga ping awm nual mahse, a theih ang angin sial tlang hna thawh niin, inkalpawhna bikah harsatna liantham thleng a la awmlo.
May 30 zan a Inrellai pahnih telin In pasarih chim a bungruate senghawi hna chu Bazar Veng leh Chandmary ten thawh chhunzawmin, Central YLA ruahmanna in Veng pahniha hnatlangte hi Brang YLA dang, hnatlang tura ruatten an pui.
Inchim vanga National Highway 02 ping chu sialtlang theih huntur a la hriatlohva, kawng pinna lai hi Metres 150 chuang vel niin, bungrua senghawi ngai a la tam vangin kawngpui tlang huntur hi a la hriatloh.
National Highway-02 a pin vang hian Lawngtlai khawpui ah Hmar lam atanga Chhimlam pantur Lirthei, Medium Motor Vehicle chin hnuailam chu Bazar Veng atangin Chandmary lane hnuai kawng zawhtir an ni a, Chhimlam atanga Hmarlam panturte chu National Highway 502A (Multi Modal kawng) zawhtir niin, Motor lian tan Lawngtlai khawpui paltlang theih a nilova, By pass Road ah kalvek tura tih an ni.
Lawngtlai a Inchimna hmun hi Lawngtlai West MLA Pu C.Ngunlianchunga chuan Inrinni atang khan thutchilhin, Lawngtlai East MLA, Dr.Lorrain Lalpekliana Chinzah pawh Aizawl atangin Lawngtlai thlengin vawiin khan Inchimna lai te a tlawh bawk.
Tarlantawh angin Lawngtlai a Inchim ah hian thi leh hliam an awmlova, vanneihthlak takin Hotel a thleng mi pathum In in a chhimpuite chu himtakin chhanchhuah an ni.