.jpeg)
Sorkar thuchhuaha tarlan a nihdanin, vawiin khan Pu Nityanand Rai, Union Minister of State for Home Affairs chuan Chakma Autonomous District Council ( CADC) tlawhin CADC Hall - ah inkawmna neih a ni a. Pu Cheemala Siva Gopal Reddy, Lawngtlai Bawrhsap, Pu Lokeshwaran R., Superintendent of Police, Lawngtlai, Pu Molin Kumar Chakma, CEM (CADC), EM leh Official pawimawh ten Union Minister of State hi Helipad - ah an hmuak.
CADC Hall- ah State leh CADC official, MLA leh NGO - te meeting neihpui nghalin, Pu Molin Kumar Chakma, CEM (CADC) chuan thutkhawm hi a kaihruai. Hetah hian CADC, dinhmun tlangpui, hmasawnna hnathawh hrang hrang leh harsatna an neihte bakah hmasawnna awm tura pawimawh kawng hrang hrangte chu ngaihthlak a ni a. Pu Molin Kumar Chakma, chuan CADC in mamawh an neih hrang hrangte ziakin a hlan nghal a ni.
Pu Nityanand Rai chuan harsatna hrang hrang a hnena an thlente chu sutkian a nih theih nan a theihtawp chhuahpui a tum thu a sawi a. A bik takin ziaka a dawnte chu sawrkarlaipui hnenah a thlen tur thu a sawi. Union Minister for State chuan India ram chu 'Developed Nation' a siam turin Sawkarlaipuiin theihtawp a chhuah tih tarlangin, a bik takin One Nation One Ration Card, New Education Policy 2020, inkalpawhna leh Hriselna (health) ah te 'Flagship Scheme' pawimawh tak tak duanchhuah leh kalpui mek a ni, a ti.
Union Minister of State chuan Prime Minister- in Hmarchhak State- te a ngaipawimawh hle tih sawiin, Hmarchhak State ten hmasawnna tluantling an neih phawt chuan India Ram hi 'Developed Nation' ah siam a ni ang, a ti. Pu Nityanand Rai chuan Autonomous District Council pathumte tan sawrkar laipuiin theihtawp a chhuah zel dawn a ti a. Myanmar leh Bangladesh nena ramri nei vek an nih bawk avangin, ramri venhim kawngah pawh theihtawp a thawkho turin a chah a. Pu Nityanand Rai chuan India khua leh tui an nihna hrechianga, ram leh hnam hmasawnna tura theihtawp chhuah fo thin turin a sawm nghal bawk.
Pu Nityanand Rai, Union Minister of State for Home Affairs hi Pu Devesh Kumar, Bihar MLA chuan a rawn tawiawm thei a, vawiin vek khan Aizawl lam panin an chhuak leh nghal a ni.