PWD Minister in Multi Modal kawngpui leh Diltlang leh Chawngte 'P' inkar kawng a tlawh.

Nimin khan   PWD Minister   Pu Vanlalhlana, chuan National Highway 502(A) Kaladan Multi-Modal Transit Transport Project kawngpui leh  PMGSY III  ROAD, Diltlang South - Chawngte 'P' kawngpui siam mek chu a hmunah kalin a enfiah.

Pu Vanlalhlana chuan Multi Modal Kawngpui chu kawngpui pawimawh tak a nih avangin uluk leh duat taka enkawl a tul hle a ti a. KMMTTP chhak lama NHIDCL ten  NH-54 kawngpui an laihah lei vung an paih fimkhur tawk loh avanga harsatna awm thin chu veiawm a tih thu a sawi a. Tun dinhmunah hmun thenkhata kawng tlabal leh chhezual lai chu chak taka siamthat mek a ni chu lawmawm a tih thu sawi a. Sawrkarin kawng tha a ngaipawimawh tih sawiin, kawngpui siamthat hna thawktu ABCI- te pawh tha leh rintlak taka hnathawk tura chahin, KMMTTP Road enkawl mektu Mizoram PWD te pawh theihtawp chhuah turin a chah   bawk.

PWD Minister hian PMGSY III  ROAD, Diltlang 'S' - Chawngte 'P'  pawh a hmunah a en a, Diltlang 'S' khuaten an lo hmuakin, Pu Vanlalhlana chuan sawrkarin kawngpui tha neih a duh avanga a hmun ngeia lokal a nih thu sawiin,  Diltlang 'S' khuaten kangmei nasa tak an tuar chu thinlung taka a tawrhpui tih sawiin, Kangmei tuarte   tanpuina cheng 10,000 a hlan nghal a ni. Pu Vanlalhlana chuan PMGSY III  Road,  Diltlang 'S' - Chawngte 'P'  hnathawk mektu Contractor- te chu an  hnathawh uluk tur te,  mipuite mamawhna hriaa, tha leh rintlak taka hnathawk turin a chah.

 Minister hi Pu Lalfamkima, Dy. Speaker, Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA ni bawk bakah Pu T Lalhlimpuia,Lunglei West bialtu MLA, leh Pu C. Ngunlianchunga, Lawngtlai West bialtu MLA ten an tawiawm.