State pawna thawnchhuahtur Hmarcharo, Dr.Lorraina'n nimin khan a vailiam.

Dr. Lorrain Lalpekliana Chinzah, Adviser to Chief Minister (Agriculture & Farmers Welfare etc.)   chuan nimin  khan Lawngtlai District chhung khaw hrang hrang aṭanga Mizo Hmarcha ro thar chhuah, Metric Ton 1.5 chu State pawn (Assam) a hralh chhuah turin a vai liam.

Lawngtlai Chandmary-a buatsaih Hmarcha ro thawn chhuahna ah  hian, Lawngtlai East MLA ni bawk Dr. Lorrain Lalpekliana Chinzah chuan  , Mizoram sawrkarin kuthnathawktu te chu a ngaihpawimawh thu leh, an thlai thar chhuah engemaw zat a lei mek thu a sawi a. Lawngtlai District chhung aṭanga Hmarcha ro Metric Ton 1.5 zet mai ram pawna thawn chhuah tham kuthnathawktute'n an thar chhuak thei chu lawmawm a tih thu leh, sawrkar chu an lamah a ṭang reng thu a sawi a. Thahnemngai taka thawk chhunzawm zel turin a fuih bawk.

Hmarcha ro thawn chhuahte hi, Lawngtlai District khaw hrang hrang aṭangin Lairam Organic Farmer Producer Co. Ltd. te leh, Bungzawl Organic Farmer Producer Co. Ltd te tangkawp chuan lakkhawm hna thawkin, District Agriculture Office Lawngtlai leh Mission Organic Mizoram (MOM) i/c State Lead Agency te puihbawmna in Assam lama hralh chhuah atana ruahman a ni a. Lawngtlai District chhunga kuthnathawktu hamthatna tura thawktute inpekna leh, an hmalakna te chu fakawm a tih thu Adviser to Chief Minister chuan a sawi zui bawk.

He programme-ah hian Pu Caleb Vanlalrinngama, Asst. DAO, Pi Lalramhluti Chinzah CEO, Lairam Organic FPC Ltd., Pu C. Rodingpuia CEO, Bungzawl Organic FPC Ltd. leh FPC Board of Directora te bakah, ZPM Lai District Headquarters Lawngtlai aiawhin Pu H. Lallawmzuala Secretary i/c Media, IT & Publicity Dept. te leh, Tv. T. Lalrinawma Secretary ZPM General Headquarters Ṭhalai te an tel a ni.