Lai Autonomous District Council a ZPM Sorkar chu a nghing a, BJP kaihhruai United Legislature Party te chuan an hruaitu M.Kawnpui bialtu MDC, Pu N.Zangura hovin vawiin tlai khan Governor hmuin, LADC ah Sorkarna an siamtheih thu thlenin, Sorkarna siamtir turin an ngen.
Tun 11th LADC Term kallai ah Sorkar inthlak vawi thum thleng tawhin, tuna ZPM Sorkar hi thlak a nih leh chuan Sorkar inthlak tum li na tur a ni dawn.
Tuna ZPM hruaitu, Chief Executive Member Pu V.,ZIrsanga hi kumin February 27 khan CEM atan lakluh a ni a, a hnu March 17 khan Executive Member pakua lakluh an ni leh a, Sorkar dinglai chuan Emergency Session pawh April 17 atanga 22, 2025 khan paltlangin Budget pawh passed a nih hnu ah, eptu lam tangrual, MNF, MDC 11, ZPM, MDC 2 (Pu N.Zangura leh Pu Tuturu Singh) leh pawnlam atanga thlawptu Congress MDC 1 an vaiin MDC 14 te chuan ZPM atanga BJP zawmta Pu N.Zangura kaihhruaina hnuaiah LADC ah Sorkar din tumin hmalakna hi an kalpui mek a ni.
LADC ah hian mipui thlan MDC 25 awmin, CEM rawtna anga Governor in member atan a ruat 4 nen Member 29 an awm mek a, tun dinhmun ah Elected Member 25 ah United Legislature Party chuan pawnlam atanga an mahni thlawptu Congress MDC pakhat nen Member 14 an nei mek niin an insawi a, ZPM lam chuan MDC, 11 an nei mek.
Tags
News