Kum 2000 a din Lawngtlai Auto Rickshaw Owners Association chuan vawiin khan an kum 25 na Silver Jubilee,.LADC, Hall Lawngtlai ah an lawm.
He hun hi Lawngtlai West bialtu MLA Pu C.Ngunlianchunga'n hmanpuiin, Auto Rickshaw enkawltute chu khawpui hmel lanna an ni tih hrereng tura chahin, lirthei enkawl leh khalhah midang leh anmahni ngei pawh an himna tur ngaipawimawh turin a chah a, tanpui ngaite tanpuia, Lairam leh hnam hming tithaa, timawilotu an nithei tih hrereng chunga Pathian tihna nen an hna rinawm taka thawk turin Pu C.Ngunlianchunga chuan Auto Ricshaw enkawltute chu a chah.
Pu C.Ngunlianchunga chuan Lai Autonomous District Council a Sorkarna kal mumal theilo chu pawi a tih thu sawiin, Auto Rickshaw enkawltute chu mipui nen insireng an ni a, ram inrelbawlna ah ngaihtuahna tak tak senga, an theih chin chin ah Pathianin rorelna hran a pek zahawmtaka vawng theitur ngaihven turin a chah bawk.
Lawngtlai Auto Rickshaw Owners Association President Pu C.Zathianga chuan Auto Rickshaw enkawltute chu ruihtheihthil lakah fihlimse a duh tih sawiin, an hna chu eizawnna a nih rualin, mipui rawngbawlna a ni tih hriatreng tul a tih thu a sawi.
Silver Jubilee lawmna hi Pu T.Lalkhawngaihsanga Finance Secretary in a kaihruaia, Khuallian hovin Jubilee dar vuak niin, Khuallian hian Silver Jubilee hriatrengna a hawng a, an member chatuanram pan tate sunna neiin, fuihna leh Jubilee lawmpuina lam hawi mihrang hrang atangin ngaihthlak a ni a, tlailamah Jubilee ruai an kilho ang.
Lawngtlai District Auto Rickshaw Owners Association Silver Jubilee hi All Mizoram Auto Rickshaw Association hruaitute bakah Lunglei leh Siaha a Association hruaitute leh Lawngtlaia Taxi leh 2 Wheeler Association, Pickup Association leh ZDU hruaituten an hmanpui.
Lawngtlai Auto Rickshaw Owners Association ah hian Member 300 vel an awm mek.