Lawngtlai District-a sawrkar hnathawk pensioner inzawmkhawm pawl, Mizoram Civil Pensioners Association ; District Headquarters, Lawngtlai 2nd Annual Conference chu vawiin khan LADC Hall, Lawngtlaiah hman a ni a. Lawngtlai East MLA Dr. Lorrain Lalpekliana Chinzah chuan he hun hi khuallian niin a hman pui.
Khuallian chuan thusawiin, Mizoram Civil Pensioners Association, District Headquarters Lawngtlai te'n an hun pawimawh taka khuallian tura an sâwm chu lawmawm a tih thu a sawi a. Civil Pensioners te chu ram leh hnam tana theihtawp chhuaha hna lo thawk thin tawhte leh, an that lai hun tam zawk ram leh hnam tana hlana, an theihna leh thiamna te midangte tana seng ral thintute an nih thu a sawi a. Sawrkar hna an thawh chhunga rinawm tak leh ṭhahnemngai taka thawk a, pension thlenga Pathianin damna leh hriselna a pek avangin lawmpuina thu a sawi bawk.
Adviser to Chief Minister chuan, Mizoram sawrkarin a hnathawktute leh pensioners te a ngaihpawimawh thu sawiin, an hlawh leh hamṭhatna te pawh a hma thei ang bera pek thin an nih thu a sawi a. Kum upa, hmeichhia leh rualbanlo te hamṭhatna tih pung a nih thu sawi bawkin, hriselna kawnga hma kan sawn theihnan Mizoram Universal Health Care Scheme kalpui a nih thu a sawi a, kawng hrang hranga sawrkarin mipuite hmasawnna tur leh changkanna tura a hmalakna leh ruahmanna te a tarlang bawk.
He hun hi Pu Lalthangmawia Vandir, President Mizoram Civil Pensioners Association Lawngtlai chuan kaihruaiin, Pu Lalsiama Guite, Chief Manager, SBI Lawngtlai Branch chuan kalkhawmte hnenah Bank leh a kaihhnawih chungchang zirtirna a pe a. Pu K. Zozamliana, Secretary Mizoram Civil Pensioners Association Lawngtlai chuan pawl dinhmun leh report tlangpui pe in, chawhnu lamah rorelna an nei zui bawk a ni.
Mizoram Civil Pensioners Association ; District Headquarters Lawngtlai hi kum 2022 khan din tan niin, tun dinhmunah hian sawrkar hnathawk pensioner hrang hrang mi 200 vel member an awm mek a ni.
Tags
News