Larsap chuan Mizoram District zinga theihna nasa tak nei Lawngtlai District tlawhna hun tha a nei chu lawmawm a tih thu a sawi a. Numaligarh Refinery Limited (NRL) in Lawngtlai District chhunga zirna tihhmasawn nana CSR kaltlanga school 14 te smart board a pe chu lawmawm tiin, smart classroom nei tura ITI Ltd. leh implementing partner Living Thoughts organisation-te hmalakna fakawm a tih thu a sawi bawk.
Lawngtlai District chhunga khaw 13, power supply pek la ni lote'n an neih thuai theih nana hmalak a tul thu sawiin, sawrkar department, VC leh NGO te chu khawtlanga dawmkan ngaite ngaihvena puih tum turin a chah. Ramri bulhnaia awmte zalen taka inkalpawhna Free Movement Regime (FMR) chu tunhma atanga lo neih tawh a nih thu sawiin, tunhnaiah thenawm ram buai avangin khua leh tuite him zawk nan leh dan lova ramri kana thil tih a awm loh nan inkaihhruaina thar siam a ni a, hei hian harsatna siam a tum lova, khua leh tuite tana tha tura ruahman zawk a ni, a ti a.
Larsap chuan Diltlang South khuaa kangmei tuarte kawmin a tawrhpui thu a hrilh a, PMAY hamthatna hmanga in an din leh ngei theih nana hma la turin District Bawrhsap a chah nghal a. Governor's Discretionary Grant kaltlangin kangmeiin a tih chhiat in neitu chhungkaw 9 te hnenah tanpuina sumfai Rs 1,00,000/- leh inluahtu chhungkaw 8 te hnenah Rs 5,000/- theuh a hlan a.
Larsap chuan DC Bungalow, Chawnhu-ah Lawngtlai District chhunga MLA leh LADC leh CADC a CEM leh Executive Member te a kawm bawk.