Food Civil Supply & Consumers Affairs Minister Pu B.Lalchhanzova chuan vawiin khan Vathuampuia YMA Branch kum 50 tlin lawmna YMA Hall, Vathuampui ah a hmanpui.
Pu B.Lalchhanzova chuan Vathuampui Branch YMA te Golden Jubilee an lawm thei chu a lawmpui thu sawiin, Pathian chuan mi zawng zawng hi midang tana ṭangkaina neiturin min siama, Pathian in kan kawngtur a ruat haichhuak theitur chuan tumruhna leh chhelna, tih taktak nen kan beih a tul a ni a ti a, YMA hmalaknate khawtlang leh ram tan a tangkainate chu an thawhrimna vang a ni a ti.
Supply Minister chuan mirethei leh harsa zawk ten an chanvo tur diktak an chana, mahni chanvotur nilo changte tihtawp chu Sorkarin a ngaipawimawh hle tih sawiin, heivang hian Ration Card siamthat leh siamrem pawh kalpui a ni a ti.
Revenue changtu Minister chuan Revenue Department chu awmzenei zawka kalturin siamrem mek a nih thuna sawia, Ram leh Inhmun pass te tunlai thiamna hmangin chhinchhiah mek a ni a, Revenue Department chu Online hmanga dawr theih tur leh mimal document pawimawhte mahni a Onlinena haichhuah theih maiturin dah tummek a ni, a ti bawk.
Vathuampui Branch YMA Golden Jubilee lawmna ah hian Khualzahawm, Central YMA a Fin. Secretary Pu M.S Ralte pawhin thusawiin YMA Member te Golden Jubilee chibai a buka, Vathuampui Branch chu ramrina awm, ram leh hnam tana theihtawp chhuahtu an ni chu chhuanawm a tih thu a sawi.
Central YMA hruaitu chuan Raltlante chu YMA in a thlahthlam dawnlo a ti a, Raltlante chuan kan ram, khawtlang leh kohhran ziate zirchianga an mahni insiamrem zung zung turin a chah a, khua leh tuiten chanvo kan neih angte erawh beisei rihlo turin a chah bawk.
Vathuampui Branch YMA Golden Jubilee lawmna ah hian Khuallian Pu B.Lalchhanzova chuan Jubilee Lungphun a hawnga, hlado chhamin Jubilee dar vua in mithlanbikten silai an kapa, tlailam ah Golden Jubilee ruai an kilho.