Lawngtlai West bialtu MLA Pu C.Ngunlianchunga chuan kan ram chhungah Assam Rifle te inlulin dan chu inhnuaichhiahna ni a a hriatthu leh ngawihbo chi ah a ngaihloh thu a sawi.
Tukin khan Lawngtlai AOC Veng a C.Ngunlianchunga MLA Chawlhbuk, YLA Information Centre leh MUP Recreation Centre, cheng Nuai 17 senga MLA Fund a sak a hawnna ah Pu C.Ngunlianchunga chuan Mizoram Power Minister chu Assam Rifle ten chhiah buaiin a zinkawngah harsatna an siamsak tih sawiin, Mizoram chu rambuai a nilova, kan Minister hial Assam Rifle ten harsatna an siamsak chu hnam anga inhnuaichhiahna ah a ngai tih sawiin, he thil hi ngawihbopui chi a a ngaihloh thu a sawi.
Lawngtlai West MLA chuan hetianga Power Minister chunga Assam Rifle te an chetchhan hi chiangtakin mipui ah puanzar a phut thu sawiin,mipui aiawhtu Minister hial laka Assam Rifle te chetdan chu an mahni lamin a chhan an sawifiah ngei theih nan Sorkarin hmalakna hmanhmawh kalpuise a duh thu a sawi.
AOC Venga YLA Information Centre leh MUP Recreation Centre inkawp C.Ngunlianchunga Chawlhbuk hi a hnuai chu Waiting Shed leh vantlang inthiarna leh ATM Booth dahna tur atan ruahman niin a dung feet 53 a vang feet 18 niin a chung, YLA Information Centre leh MUP Recreation Centre tur chu a dung Feet 48 a vang feet 18 niin Pu C.Ngunlianchunga chuan AOC Veng tan rotling an hnutchhiah thei chu khawtlang hruaitu leh mipui nen an tanhona rah a nih thu a sawi.
C.Ngunlianchunga Chawlhbuk hawnna hi VCP Pu Rochharliana'n kaihruaiin, bialtu MDC, Pu LR Dingliana Chinzah bakah NGO hruaitu leh Congress Unit hruaituten Lawngtlai West MLA chungah lawmthu an sawi.
Tags
News