Tukin zinglam zinglam dar 2:30 vel khan Lawngtlai Vengpui,SP Office thlang a Pu CT. Lalthanzama In, Assam type, Pu Siamthanga te luahlai chu leiminin a hnawl a, bungrua engmah chuh hman a ni lova, he In a awm mipathumte erawh vanneihthlak takin, himtakin an tlanchhuak
He In ah hian Pu Siamthanga leh a fate pahnih riakin an bangchhaklam chu leimin hian a rawn nekchhia a, hemi atang hian a theih ang anga insaseng nghalin himdam takin an chhuak thei a, an chhuahhnu reilote ah leimin hian In hi a hnawl ta niin Inluahtu Pu Siamthanga chuan The Lawngtlai Post a hrilh.
Chhiattawhna hmunah hian VC leh YLA hruaitute bakah mi tlawmngaite thawkchhuak nghalin, zanthim hnuai leh ruahsur kar ah chetlak theih a nih lutuk loh vangte, a chengte ber an him vangin bungrua senghawi theih ang ang senghawi tur leh a theih ang anga chhawmdawl hna thawk turin khawvar lam nghah mai nise an ti a, vawiin lam ah khawtlang huapin Inchhia leh bungrua senghawi hna hi Vengpui khawtlangin an thawk dawn.
Tukin zing khan Lai Autonomous District Council a Chief Executive Member Pu C.Lalmuanthanga chuan helai hmun hi tlawhin chhiat tawkte thlamuanin, Khawtlang hruaitute hnen ah hnatlang thingpui lumna tur a pek bakah In neitu leh In luahtute pawh tawrhpuinan tangkafai a hlan a, chhawmdawlna awmthei ang angte a thei anga bawhzui a tum thu a hrilh.
Leimin in In a hnawl thu hi DC Office lam ah pawh khawtlang hruaituten an thlen nghal a, bialtu MDC, LADC a Chairman Pu V.L.Hmuaka pawn helai hmun hi a thutchilh.
Lawngtlai East bialtu MLA, Adviser to Chief Minister Dr.Lorrain Lalpekliana Chinzah chuan vanduaina tawkte a tawrhpui thu sawiin, Sorkar atanga chhawmdawlna awmthei ang angte rangtaka kalpui a nihtheihnan theihtawp chhuah a tum thu a sawi.
Leiminin In a hnawlna chhan hi khawtlang hruaitute chuan a chhaklama S.P Office atanga tuihawk luangthla chu a luanna tur tuihawkluankawr mumal a awmloh vangin lei hi minta ni a an ngaih thu an sawi.