Bangladesh Raltlan mi 126, BSF ten Lawngtlai Police kut ah vawiin tlai hian an hlan fel. Chamdur 'P' panpui tum an ni.

Bangladesh atanga an sahimna zawnga Lawngtlai District a tlanlut mi 126 te chu vawiin tlai khan Border Security Force ten Chhipui a Border Out Post ah Lawngtlai District thuneitute kut ah an hlan.

Heng an sahimna zawnga Lawngtlai District a lutte hian July 3 Nilaini khan Damdep-II lutin an vaiin mi 93 an ni a, dan lova ramri kan an nih vangin BSF te hian Bangladesh lam ah nawrkir turin hma an la zui a, an dinhmun hi District thuneitute piahlam ah State Sorkar lam ah thlen a nih hnu ah vawiin tlai khan BSF te hian Lawngtlai District thuneitute kut ah hlanin Police hotute leh Magistrate ten dawngsawngin a tira mi 93 kha midang 33 in belhin an vaiin mi 126 an ni.

Delhi-a cham mek Chief Minister Pu Lalduhoma chuan, ramri kana Mizoram chhung an lo thlen tawh chuan, state sorkar mawh phurhna nih thu leh, engkawng mahin thawn kir a remloh thu Prime Minister Pu Narendra Modi a sawipui hnuah, raltlante hi nawrkir lovin, Mizoram Police kutah hlan anni ta  a ni.

Heng Bangladesh atanga raltlante hi vawiin tlai hian Chamdur 'P' panpui nghal tura ruahman an ni.

Central Young Lai Association chuan Myanmar atanga an sahimna zawnga rawnlutte nawrkir leh nawrkir tuma hmalak a nih ngailoh lai leh zalen taka an rawnluh theih laia Bangladesh atanga kan unaute an sahimna zawnga rawnlutten harsatna an tawkfo chu hriatthiam har an tihthu leh an chungah hetiang hi thlengzui tawhlose an duhthu Sorkar thuneitute hnen ah an lo thlen thlen tawh bawk.