Ngengpui Sanctuary atanga Ngengpuikai khaw ram a Sai chhuak chu Sanctuary chhungah a lalut lova, Sanctuary a hnawhlut tumin beih mek a ni.
Sai hi Ngengpuikai khaw ram ah hian tunthla tir lam atang khan hmuh tan niin, Forest Department lam nen tangkawpin mipui lamin hnawhbo tumin an bei mek a, rithei chi hrang hrang nen hnawhbo tumin bei mahse, tun dinhmun ah Sai hi Sanctuary chhungah a la lutlo ni a hriat a ni.
Sai hian thlawhma a tihchhiat Deputy Conservator of Forest Chhimtuipui Wlildlife Division a report lut tawh chu chhungkaw 18 niin, report dang pawh a la luhbelh a rinawm. Dr.R.Lalruatfela Dy.Conservator Forest chuan Sai in thlawhma leh thlam a tihchhiatsak te chu zangnadawmna an hmuh ngei theih nan hmalak a nih tur thu The Lawngtlai Post a hrilh.
Forest Department lam ten an hriatdan chuan Ngengpui Sanctuary ah hian Sai hi pathum awmin, pakhat chu Sanctuary pawn a awmmek hi a ni.
Sai chungchangah hian Dr.R.Lalruatfela, Deputy Conservator of Forest, Chhimtuipui Wildlife Division chuan mipui hriattur thuchhuah siamin, Lawngtlai atanga South Bungtlang inkara khaw awm te a bik takin khualzin leh lonei mite fimkhur tur leh chhawnchhaiha, tina loturin a hriattira, Sai hi hmu emaw, a awmna chin hria chuan mahni khua theuha Wildlife Guard-te a rang lama hriattir zel turin a ngen.
Sai hi The Wildlife Protection Act, 1972, in Schedule-I hnuaiah dahin, chhawnchhaih, tawktarh, tur a hrai, tihnat emaw tihhlum a khap a, he dan hi bawhchhiat anih chuan, pawisa cheng 25,000 aia tlem lo leh lung in ah, kum 3 atanga kum 7 thleng tan theih a ni.