Parva leh Damdep huamchhungah Ni 70 vel Power supply an dawng tawh lova, hemi chungchang ah hian The Lawngtlai Post chuan Power & Electricity Lawngtlai Division a E.E Pu Ramdinsanga biain, mipui harsatna tawh sutkian nan a hma an lakdan a sawipui.
Er.Ramdinsanga chuan Lawngtlai Division ah thawktu an indaihloh hle tih sawiin, hemi chungchang hi vawi engemawzat an hotute hnenah an thlen tawh thu leh an beisei angin thil tih zung zung theih a nihloh thu a sawi.
Tuna Parva leh Damdep Area vel kawlphetha khaihlakna chhan chu Bungtlang South a Power Sub Station chu Sorkar kut ah hlan a la nilova, heivang hian helai atanga a chawmtur khua ten Kawlphetha an hmuh thatloh phah niin a sawi a, tundinhmun ah chuan Chawnhu, Lawngtlai atangin Lawngtlai District Chhimlam leh Chhimthlanglam (Khawthlanglam) hi chawm vek a ni a, an line thui zawng hi Kilometres 493 zet a nih thu leh hetianga line thui lutuk hi a enkawltu thawktu an indaihloh vangin harsatna an tawk nasa niin a sawi a, Chawnhu leh Bungtlang South inkar line hi Kilometres 50 chuang niin, ramhnuai pik leh khawkrawk tak tak paltlang a ni a, helai inkarbik ah pawh line chhia a awmfo bak ah, Chawnhu a 11KV Panel chhiat vangin kawlphetha pek theihloh chang hi a awm fo bawk a, tuna a nih ang ang hian theihtawp chhuahin hmalakna erawh an kalpui reng thung.
Bungtlang South a Power Sub Station hi North Eastern Region Power System Improvement Project (NERPSIP) hnuaia bun niin, kumin May 24 khan hmantheih tura peihfel a ni tawh a, Power Grid Corporation of India Limited lamin State Sorkar kutah an la hlanloh vangin P&E Department Mizoram lam tan hmalak ngaihna a la awmlova, Power Grid lamin Sorkar kutah an hlan hun a hmalakdan tur ruahmanna pawh thawktuten duang tawhin, Bungtlang South atangin Feeder hrang pathum siamin, chung chuan chawmbik khaw hrang hrang an nei dawn a, line pakhat a chhiat vanga zavaia kawphetha hmuhloh vek ang chi chu tihtawp theih thawktuten an beisei.
Bungtlang South Sub - Station hi Chawngte kaltlangin Lungsen atanga chawm a ni a, engemawchanga Lawngtlai leh Lunglei inkar a line thalo a awm changa zavaia thim vek ang chi kha, Bungtlang South Sub- Station hi Sorkar kutah hlanfel a nih hnu chuan helaiin a chawmte chuan an tuarve dawnlo.