Lai Autonomous District Council Emergency Session, tunkar Zirtawpni thleng awhtur chu nimin khan Chairman Pu V.L.Hmuaka kaihhruaina hnuaiah LADC Session Hall. Lawngtlai ah tan a ni a, vawiin khan Bill pakhat sawihovin pawm a ni a, naktuk ah Deputy Chairman thlan a ni dawn.
Nimin Session ah MDC loni tawh Pu V.L.Hminga sunna hun hman a ni a, Chief Executive Member Pu C.Lalmuanthanga'n LADC Budget a pharh bakah bill pakhat House ah a pulut.
State Sorkar chuan District Council te sum a pekdan chu tidanglam hretin, a hlawmin a hmanna biktur bithliah lovin a pe a, heihi LADC Session ah a hmanna tur ruahman niin, Salary atan Rs. 23,126.21 lakhs, Non-Salary atan Rs.1,233 lakhs dah niin, Budget hi a vaiin Rs. 24,359.21 lakhs a ni a, kum kalta 2023-2024 aiin Nuai 3238.49 in a tamzawk.
Kum kalta a sum indaihlohna phuhrukna tur Supplimentary demand for grant Nuai 1785.44 CEM hian House ah a pharh bawk. Kum 2024-2025 chhungin chhiah tlingkhawm atangin cheng Nuai 350 hmuh tum a ni.
Vawiin Session ah nimin a CEM in a putluh, The Lai Autonomous District Council (Constitution, Conduct of Business, etc) (Fifth Amendment) Bill, 2024. chu House ah sawiho niin pawm a ni
LADC a Deputy Chairman Pu C.L.Lianzuala chuan nimin khan banna Chairman hnen ah a thehlut a, naktuk Session ah Deputy Chairman thlan a ni dawn, hriattheih chin ah Pu H.Lalmuansanga’n chuhturin hming a pelut. Pu C.L Lianzuala hian midang pariat nen June 20 khan ZPM an zawma, tuna Congress leh MNF Sorkar intawm ah Deputy Chairman a nihzui zel chu thil kalhmang a nihloh vanga a nihna bansan a ni.
Tags
News