LPS Youth Icon 2024 top 10 te chuan khuarel chhiatna tuarte puala charity concert an buatsaih atanga mipui sum thawhkhawmte an sem chhuak zel a, Nilaini khan Lawngtlaia leilung chhiatna tuarte puihna tur sum chu Central YLA hruaitu kutah hlan a ni.
LPS News Editor Pu C Lalduhawma'n tanpuina sum cheng nuai 2 sing 1 sang 6 leh 400 chu Central Young Lai Association (CYLA), General Secretary Pu JH Lalrindika hnenah Nilai chhun khan Aizawla LPS Office-ah a hlan a, heng tanpuina sum te hi Lawngtlai khawpui chhunga leilung chhiatna tuarte hnenah hlan leh a ni dawn a ni.
Tanpuina sum in hlanna hi LPS office ah neih a ni a, sum dawngtu Central YLA General Secretary Pu JH Lalrindika chuan LPS leh Youth Icon ten leilung chhiatna tuarte puala Charity Concert an buatsaih chu ropui a tih thute, chuta mipui sum thawhkhawm Lawngtlaia khawpuia chhiat tawkte puih nana pek a ni chu lawmawm an tih thu sawiin, tanpuina sum thawhtute chungah an lawm hle thu a sawi a ni.
LPS Vision Production leh Youth Icon 2024 top 10 te chuan June ni 7, 2025 zan khan ruah sur nasa avanga khuarel chhiatna tuarte puihna turin Charity Concert an buatsaih a, vehbur an khawn atanga mipui sum thawhkhawm tling khawm te chu Vaivakawn, Aizawla cheng leikhi avanga an chenna in rauhsan te, Serchhip khaw chhunga chhiatna tawk leh Lawngtlaia chhiatna tuarte hnenah hlan a ni.