.jpg)
ADC dang ang bawkin LADC ah hian Sorkar inthlak, CEM thlak ang chi hi a thleng fova, tunah pawh LADC a Sorkar dinglai chu a nghing mek.
Hetianga Sorkar inthlak a awm hian, an thlak chhan puanzar thin hi a thlaktute hian thlak an duh chhan diktak a ni em tihte chu rinthu pawn sawi chi a nilo hial maithei a, Sorkar dinglaiin rin a hlawh miauhloh chuan thlak duhtu an lo tam zawk si chuan Sorkar inthlak chu a thlenglo theilo a ni ber.
Thilpawimawh tak, mipui lam pawhin an chik ngaita ni a lang chu, Sorkar a inthlak emaw, an hruaitu an thlak emaw hian an thlaktak ai khan an tha zawk em tihte, ram leh hnamin enge sawtpuina a neih tih te a ni.
Lalna leh thuneihna inchuh ringawt vanga Sorkar kal fumfe theilo ang chi hi chuan eng dinhmunah mah min hlangkai tak taklo ang tih a chiang a, chutih rualin, anni aiin kan tha zawk ngei ngei dawn a, ram leh mipui tan kan tangkai zawk ang tihna thinlung nen a Sorkar dinglai thlak a nih a, chu an tumna tihlawhtling tura hma an la a nih chuan, a rah pawh ram leh mipuiin an seng ngei ngei dawn a, hruaitu atan an duhber te an ni chho hial thei ang.
LADC hian hruaitu thlak hi kan thatpui leh thatpuiloh chu a hrechiangtute chu kan Politician te tho an ni a, vawi engemawzat Sorkar inthlak, hruaitu thlak te kan tawn tawh atang hi chuan thil ropuitak pawchhuak hmuhtur a tamlo deuh em aw, a tihtheih.
Engpawhnise, mipuiten an aiawha ram rorelna dawhkan kiltura an thlanten, tul leh tha ni a an hriat a an kal hi, ram hmel lanna langsar tak a ni a, Politics virvel hi ram hmel tibal a, atifai tu a nih miau vangin, Sorkar a nghing emaw, nghinglo emaw pawhnise, awmzenei leh hmalam pan nasa zawnga hruaituten mipui an hruai a pawimawhna hi a zual deuh deuh dawn a, hetiang hmun thlenpui thei apiang chu hruaitu tha an ni mai.