Vawiin khan Lawngtlai District Deputy Commissioner Office Chamber- ah Pu R.Khawlliana (88) S/o Dartlinga (L) AOC veng, Lawngtlai hnenah India rama civil mite tana huaisenna chawimawina Jeevan Raksha Padak Award hlanna hun hman a ni.
He huaisen chawimawina in a ken tel Citation leh Medal hlantu Lawngtlai DC, Pu H.Lalhmingthanga chuan mi ropuite chawimawina hun hman a ni thei chu lawmawm a tih thu sawiin, Lawngtlai District chhunga India rama civil mi, mihuaisen chawimawina sang ber dawng thei a awm chu a lawmawm in a ropui a takzet a ni, a ti.
DC chuan hetiang a chawimawina sang tak dawng thei tura hma laksaktu khawtlang hruaitute chu fakawm a tih a sawi a, Chawimawina chu mahni duhthu a dawn ngawt theih anih loh thu leh mi mi huaisen te tan chauh a ni a, a District ang zawng pawhin kan lawmpui thiam a, kan ngaihsan thiam pawh a tul hle a ni, a ti.
Pu R.Khawlliana hi stroke avanga enkawl mek niin a chawimawina hi a fanu Pi R.Vanlaldiki hnenah hlan ani. Tangka fai erawh August 21,2023 khan Cheque a hlan ani tawh bawk
He chawimawina inkhawm ah hian Pu C.Laltluanga’n chhungkaw aiawhin thusawin Pu R.Khawlliana hi kum upa lam tawh a ni a, stroke avangin amah pawh a rawn tel thei lova. Midangte nun chhan thei tu dinhmuna a ding hi chhungkua pawh kan lawm hle a,India rama Civil mite hnena chawimawina hlan a nih theihna tura hma min laksaktu Khawtlang hruaitute leh sorkar lama mi pawimawh tak tak te chungah lawm thu kan sawi a ni, a ti.
Pu R.Khawlliana hian Ni 27.October, 2021 khan an kawmchhaka Power & Electricity Department ten Transformer an dah siamthat tuma hnathawkmek AOC Veng, Lawngtlai Pu H.Lalrinchhana chu Current in manin, Pu R.Khawlliana hian mautlawn hmangin a chhanchhuak a ni.
Jeevan Raksha Padak Award hi India ramin mi huaisen te, hun leh hmun harsa tak kara mahni nunna thapa midang nunna chhanchhuaktute hnen a a hlan thin a ni a. Award hian Medal, Citation leh Pawisa fai cheng 100000 a keng tel a ni.
Vawiin Medal leh Citation hlanna puala inkhawm hi Pu Abraham Beirazi Khithie, Addl. DC chuan kaihruaiin, Lawngtlai DC office staff te, AOC khawtlang hruaitute leh Lawngtlai District MJA te an tel.
Tags
News