10th North East Zone Shooting Championship neih zawh taka Gold Medal leh Bronze medal latu, Lawngtlai Chandmary Veng ve ve te chu ropui taka lo hmuah an ni.
10th NorthEast Zone Shooting Championship hi August Ni 20-27 khan,Shillong ah neih a ni a, Lawngtlai District Rifle Association atangin Mizoram aiawh a tel Cindy B. Lalchansangi, Pu B. Zirchungnunga fanu, Chandamry Veng, Lawngtlai chuan Gold Medal la in, Malsawmsangi, Pu T.Lalhlunpuia Fanu, Chandmary Veng, Lawngtlai chuan Bronze Medal a la Lawmman an lakna hi 10metre Air Rifle Sub-Youth Category ah ani.
Heng Silai kah thiam te hian nimin Zirtawpni tlai lam khan Lawngtlai lut in, Lai Women Association, Gen.Hqrs huaihawtin Areopagy ah lo hmuah a ni a, an puala inkhawm buatsaih hi Pi V.Lalrinkimi, President.LWA Gen.Hqrs chuan a kaihruai a, infiammi hlawhtlingte hi Lawngtlai Khawpui chhunga LWA Branch hrang hrang ten chawimawina pangpar an hlan a, Lawngtlai District Rifle Association, Central YLA leh Lawngtlai Chandmary Branch YLA ten lawmpuina thilpek an hlan bawk.
Pu C.Lalhmachhuana, Central YLA Sports Sub-Committee Chairman chuan Lawngtlai district ti hmingthatu Cindy B.Lalchansangi leh Malsawmsangi te chu Central YLA chuan a chhuang hle tih sawiin, an thlen chinah duhtawk mai lo a, hmalam pana ke pen zel turin duhsakna a hlan . Chandmary Branch YLA President Pu Hrilsangzuala leh Lawngtlai District Rifle Association Vice President Pu Hualngoa Chhakchhuak te pawn lawmpuina leh fuihna thu tha tak an sawi.
Cindy B.Lalchansangi chuan an beisei phak loh a LWA ten an mahni hmuahna hun an lo buatsaih chu lawmawm an tih thu sawiin, Lawmman la theia an awmna chhan chu Pawl hrang hrang te Support na an dawn vangte, Lawngtlai District Rifle Association hruaitu ten theihtawp an chhuahpui vang anih thu sawiin, an kal leh zelna turah pawh Lawngtlai District mipuite leh LDRA hruaitute tawiawmna an mamawh thu a sawi a, Theihtawp chhuah zel an tum thu a sawi bawk.
Pi Vankungpuii, General Secretary.LWA.Gen.Hqrs chuan lawmthu sawiin hun a khar a, Cindy B.Lalchansangi leh Malsawmsangi te hi Mizoram atanga National Shooter mi 8 zingah an telin, India ram ai an awh ang.