Zangnadawmna chungchangah PCCF in PWD lam a puh - Land Owner

High Court in ram neitu diktak a tihchian tawh mi 138 ten KMMTTP a an ram tihchhiat zangnadawmna lak phuta August 1, 2023 atanga Dy.Conservator of  Forest, Chhimtuipui Wildlife Division Office, Lawngtlaia Office kaitur an dan leh, KMMTTP a an ramchhungah hnathawktute chetvel an remtihloh chu an chhunzawmzel a, ram neitu intelkhawm Lawngtlai District Land Owners Association hruaitute chuan August 25, 2023 khan PCCF hmuin, PCCF chuan Ram neituten zangnadawmna an laktheihloh chungchang ah Mizoram PWD in dan 32 lai bawhchhiat an neih vang a nih thu ram neitu intelkhawm hruaitute hi a hrilh tih an hruaitute chuan The Lawngtlai Post an hrilh.

PCCF hian NHIDCL te kawnglaih enfiahin Lunglei, Lawngtlai leh Siaha District a tlawh a, Land Owners Association hruaitute hian an ramchhungah Mizoram Forest in ram an hauh tlat leh an inhnukdawk duhlo chu an mutanber ni a an sawilai leh, lungawilohna an lantir mek laia PCCF in a chhunpelh mai chu hriatthiam har an tih thu an sawi a, PCCF hi hmuhngei tumin Siaha ah an kalchilha, hetah hian PCCF chuan PWD lam a mawhpuh tih Ram neitu intelkhawm hruaitute chuan an sawi, Ram neitute chuan PCCF chu Forest Department in mimal ram chuhpuh lova insawi si a, mimal ram zautak Forest ram a rinluh atanga Forest ram a nihloh chungchang tichiang duhlovah puhin, zangnadawmna an hmuhtur ang an hmuh theih nan Mizoram Forest chu an ramchin diktak tichiang turin an ngen nawn.