India ramin zalenna a hmuh aṭanga kum 75 a tlin lawmna, Azadi Ka Amrit Mohatsav (AKAM) hmawr bawkna atana ruahman, "Meri Maati Mera Desh" campaign kal zelah Lawngtlai District chhung hmun hrang hrangah ram tana martarte hriat rengna lung phun (memorial plaque) buatsaih a ni a. Lawngtlai Chandmary veng chhunga Govt Primary School-I compound-a Havildar J. Lalrohlua, 2nd MAP hriat rengna lung phun chu vawiin khan Lawngtlai Bawrhsap Pu H. Lalhmingthanga chuan hawngin, martar chhungte chawimawina hun a hmanpui a ni.
Lawngtlai Bawrhsap Pu H. Lalhmingthanga chuan ram tana nun hlantu martarte zahna chibai bukin, Hav. J. Lalrohlua chu chhuanawm a tih thu a sawi a. A chhungte chu tuarpuina hlanin, chawimawina pangpar a hlan a. Ram tana nun hlantute chu hriat reng an ni dawn a, anmahni hriat rengna lung phun pawh uluk taka enkawl zui tur a ni, a ti.
He hunah hian Lawngtlai District Rural Development Office (DRDO) Project Director Pi Marilyn Rualzakhumthangi leh official dangte, Lawngtlai District VC Association hruaitute leh Lawngtlai Chandmary VC member-te, Hav. J. Lalrohlua chhungte leh zirlai naupang leh zirtirtute an tel a. Lawngtlai Bawrhsapin India Ram Puanzar pawt pharhin, kal khawmte'n ram hmasawn nana thawk tura intiamna, panch pran plegde an chham rual a. Chandmary VC te chuan Hav. J. Lalrohlua chhungte hnenah chawimawina thilpek an hlan bawk a ni.
2nd Batallion MAP-a Havildar J. Lalrohlua hi March ni 5, 2023 zan khan Assam leh Mizoram ramri Buarchep, Kolasib District-a an duty laiin Hav. Indra Kumar Rai, Lunglei nen an thawhpui, Hav. Bimol Kanti Chakma kut tuarin, vanduaithlak takin an nun an chan a ni.
Meri Maati Mera Desh campaign hnuaiah hian zalenna sualtu, zalenna an sual laia thite leh sipai leh state police an duty laia thite hriat rengna lung phun Lawngtlai District-ah 17 phun tur ruahman a ni a. District Rural Development Office hma lakna hnuaiah Block Development Officer-te'n mahni huam chhungah ṭheuh VC-te nen lung phun hi buaipuiin, vawiin khan hmun hrang hrangah a hawnna hun hman a ni a. He'ng hmunahte hian martarte chawimawina hun leh ram hmasawn nana thawk tura intiamna hun hman nghal a ni a. Veng leh khaw tina tual ṭo thing ṭiak 75 ṭheuh phun tura ruahman pawh kalpui nghal a ni bawk.
Tags
News