Vawiin khan Lawngtlai District Development Co-ordination and Monitoring Committee (DISHA) chu an Chairman, Member of Parliament (Lok Sabha) Pu C. Lalrosanga hovin Lawngtlai DC Conference Hall-ah an ṭhu khawm.
Sorkar thuchhuahin a tarlan danin, Chairman Pu C. Lalrosanga chuan Mizorama hmasawnna kan hmuh tam tak chu sawrkar laipui ruahmanna (scheme) hrang hrang leh centrally sponsored scheme (CSS) aṭangin a nih thu sawiin, central scheme chu Mizoramin kan chhawr thu leh ram tan malsawmna a nih thu a sawi a. Hmasawnna hna thawhna tur chungchangah sawrkar laipui a inphal zau hle a, scheme kalpui laiah kan tih ṭhat a, kan hman ṭhat chuan hmasawnna hna thawhna tur pawh a lo kal belh zel ang, a ti. Scheme hrang hrang kalpui dan digitalise a nih chhoh zel avangin digital literacy-ah hmasawn turin in-update chak a ngai tih sawiin, digital chungchangah hma lak zung zung loh chuan a hnukhawia ṭan a hlauhawmin, sum instalment dawn kawngah pawh harsatna a awm thei tih a sawi a. Kan in-update ṭhat chuan hmasawnna nasa zawk leh sum tam zawk hmuh belh zel a beiseiawm tih a sawi. DISHA Chairman chuan Mizoram hmun hrang hrangah scheme chu kan hmang ṭha tlangpuia a hriat thu sawiin, hmasawnna hna hrang hrang enkawltu leh viltute chu ram mipuite leh ram hmasawn nan tha thlah lova theih tawp chhuah zel turin a chah a ni.
He DISHA ṭhut khawmah hian Lai Autonomous District Council (LADC)-a Chief Executive Member Pu V. Zirsanga leh DRDO Project Director Pi Marilyn Rualzakhumthangi bakah, sawrkar official-te, bank leh tlawmngai pawl ai awhte an tel a. Sawrkar kum liam ta 2022-23 2nd Quarter leh 4th Quarter inkar chhunga Lawngtlai District-a sawrkar laipui ruahmanna hnuaia hmasawnna hna hrang hrang kalpui dan thlir ho niin, harsatna awmte leh a chin fel dan tur leh hma lak zui zel dan tur te sawi ho a ni.
He DISHA ṭhut khawma sawrkar laipui scheme hrang hrang sawi hote chu - PWD hnuaia Pradhan Mantri Gram Sadak Yojana (PMGSY); P&E Department hnuaia Indo-Bangla Border Flood Lighting (IBBFL) Scheme, utility shifting due to widening of National Highway, SAUBHAGYA, DDUGJY leh scheme dangte; PHED hnuaia Jal Jeevan Mission (JJM) leh Swachh Bharat Mission-Grameen (SBM-G); UD&PA hnuaia Pradhan Mantri Awaas Yojana-Urban (PMAY-U) leh Swachh Bharat Mission-Urban (SBM-U); H&FW Department hnuaia National Health Mission (NHM); Social Welfare Department hnuaia National Social Assistance Programme (NSAP) leh Integrated Child Development Scheme (ICDS); FCS&CA Department hnuaia National Food Security Act (NFSA); Commerce & Industries Department hnuaia Prime Minister Employment Generation Programme (PMEGP); DRDO hnuaia Mahatma Gandhi National Rural Employment Guarantee Act (MGNREGA), Pradhan Mantri Awaas Yojana-Grameen (PMAY-G) leh Pradhan Mantri Krishi Sinchayee Yojana (PMKSY) 2.0; BDO-te hnuaia Border Area Development Programme (BADP), Mizoram State Rural Livelihood Mission (MzSRLM) leh Deen Dayal Upadhyaya - Grameen Kaushalya Yojana (DDU-GKY); Samagra Shiksha leh Bharat Sanchar Nigam Limited (BSNL) hma lakna te a ni.
He DISHA ṭhut khawma tar lan dan chuan, DRDO kal tlanga hna thawh MGNREGA hnuaiah Lawngtlai District-ah job card 37,006 awm mekin, job card Aadhaar seeding tih tawh zat hi 99.52% a ni a. July, 2022 - March, 2023 inkarah material component aṭanga hna thawh 3,427 awmin, hna 2,507 thawh zawh tawh a ni a, thawh lai mek 920 a la awm a ni.
Tags
News