Nimin tlai dar 6:30 vel khan Lawngtlai District Chakma Autonomous District Council (CADC) huam chhunga Geraguluksora khaw daiah LPK truck a chesual a, mi 8 an thi a, midang 12 an hliam.
Borapansury Police Station atanga thu kan dawn danin nizan dar 6 leh a chenve vel khan Longpuighat khaw mi Ashok Chakma khalh LPK registration number No.MZ-01J/7038 chu Geraguluksora khaw luhdawnah kawng thlang ah tlanliamin a thlang buh hmunah a tla a, a hmunah hian mipa hlir 7 an thi nghal a, mipa pakhat chu lakchhuah a nih hnu ah a hliam tuar lovin a thi leh bawk. Thite hi Geraguluksora khaw mi vek an ni.
Thite hi - Adi Chandra Chakma (17), Amar Jyoti Chakma (14), Anilmoy Chakma (40), Anandamoi Chakma (38), Santosh Chakma (35), Tolbish Chakma (14), Amarjit Chakma (40) leh Lokhi Kumar Chakma (50) te an ni.
Borapansury CHC-ah Doctor leh Nurse an awm loh avangin a hmunah hian ECM missionary nurse te tlawmngaiin an kal a, Chhotapansury a awm BSF te'n hliam te an lo enkawl bawk . Borapansury CHC-ah doctor leh nurse an awm loh avangin hliamte hi Chawngte lamah lak an ni a. Hliam na zualte chu Lunglei District Hospital panpui an ni
He LPK Truck -a chuangte hi Congress party mi campaign a chhuak niin. Tukina Kamalanagar-a Chakma District Congress Committee ţhukhawm chuan he chetsualna a nunna chan chhungte an tuarpui thu sawiin hliamte ţanpui turin MPCC ngen ni se an ti a. Ţanpuina atan hian vehbur khawn ni se an ti bawk.
Tags
News