CEM, Pu V.Zirsanga'n Bungtlang South ah South Gate Middle School a hawng.

Lai Autonomous District Council a Chief Executive Member Pu V. Zirsanga chuan tukin zingkar khan South Gate Middle School, Bungtlang South-II a hawng.

Pu V. Zirsanga CEM chuan Zirtirtute chu, eizawnna atan maia zirtir hna thawk lovin, Samari mitha nihna rilru pu chunga zirtirtu nih  tum turin a chah a. Zirna chauh hi mi puitling ni tura mihring  chher puitlingtu a ni a ti. 

Hna chauh duha an thawhna hmuna awm leh peih si lo te hi  ram leh hnam tan a pawi a, zirna tithuan áwp thin tih hriain thahnemngai takin kan thawhna hmun apiangah a neitu nihna rilru puttlat a pawimawh a ti bawk. 

CEM chuan financial year tharah pawh LADC a MNF sawrkar chuan middle school 2 leh Primary School 1 din turin ruahmanna a kalpui mek tih sawiin, CEM a nih chhungin Middle School 4 leh Primary school 1 din a nih tawh thu a sawi bawk.

South gate Middle School chu zirnaa mi chhuanawm te chher puitlingtu lo ni se a duhthu a sawi bawk.

South Gate Middle School Bungtlang South-II hi Sept. ni 9, 2022 khan dinphalsak niin, Bungtlang South-II VC te kaihhruainain sikul insak hna hi  khawtlangin an thawka Tunah hian Zirtirtu 3, IV Grade 1 leh zirlai 20 an awm mek.