CADC Chief Executive Member (CEM) a tan MNF hruaitu Pu Rasik Mohan Chakma chu rinawmna thu tiam tira lakluh a ni.

Chakma Autonomous District Council Inthlanpui neih zawh takah MNF Party chuan seat 10 lain Party dang atanga lut nen MDC 15 a nei ta a, Sorkarna siamin thawhleh ni khan MDC te lakluh an nih hnuah vawiin khan 11th CADC Chief Executive Member (CEM) atan Pu Rasik Mohan Chakma chu Lawngtlai DC Pu David Lalthantluanga  aiawhin, Addl. DC Pu Abraham Beirazi Khithie  chuan  rinawmna thu tiamtirin a lalut.

Vawiina CEM lakluhna inkhawmah thu sawiin, Pu Rasik Mohan Chakma chuan, “Duhsak tak leh rintlak nia ngaia MNF thlang tling tute hnenah lawmthu a sawi a, sorkar rintlak leh langtlang sorkar kalpui a nih theih nan hmalak a tum thu a sawi a, CADC Sorkar ngelnghet tak a nih theih nan te, Miharsa zawkte dawmkan kawngah te, zirna tha an neih theih nan theihtawp an chhuah dawn a ni a ti.

CADC CEM Pu Rasik Mohan Chakma hian vawiin khan a pisa luah lut nghalin, CADC MDC te leh Ex-MDC ten an tawiawm.   CEM thar  hian CADC ah hian Zirna tha a awm theih nan zirna kalphung tha leh zirna In tha kan neih theih nan hmalakna hi ngaihpawimawh hmasak a aneih thu a sawi.

Pu Rasik Mohan Chakma  Borapasury a tanga thlantlin niin, MDC ah tum ruk thlantlin a ni tawh a,  CEM hi tum 5 a nihna niin, CADC ah dinhmun  pawimawh tak tak a chelh tawh  a, MLA a lo ni tawh bawk.