Pu B.Lalthafamkima motor Mizoram luhpui ani.

March 22 a Myanmar ram chhunga rawng taka thah, Lawngtlai District South Lungpher khua Pu B.Lalthafamkima leh Siaha mi pahnih ten motor an hman Pu B.Lalthafamkima motor Suzuki  Super Cary MZ 03-9720 chu vawiin  khan Myanmar atangin Mizoram  thlenpui a ni.

April 1 khan Central Young Lai Association hruaitu mi 12 te Myanmar ramah hian lutin motor awmna hi an han chian a, Nghalang khaw thlenhma kilometres 7 vel kawngthlang Feet 130 vel ah motor hi hmuh a ni a, vawiin khan Young Lai Association Bualpui Ng Sub Hqrs kaihhruaina hnuai ah YLA Member thahnem tak leh MTP te Myanmar ah hian lutin Motor hi an hnuak chhuak a, zanin hian  Motor neitu he vanduaina a nunna chan Pu B.Lalthafamkima te In ah thlenpui tum ani.

Central Young Lai Association General Secretary Pu Joseph Lalhmingthanga Chinzah chuan motor lachhuaktura tlawmngaia thawkchhuak YLA Member te chungah Central YLA a lawm takzet tih sawiin, an thawhpui MTP ten tlawmngaih chhuaha an puihna ah Central YLA chu a lawm hle tih a sawi a, Motor an hmuhlet leh theih nan a Myanmar ram chhunga YLA hmalakna puibawmtu zawng zawngte chung ah lawmthu a sawi bawk.