Editorial || PARTY RUIHCHILH HMASAWNNA DALTU.

Democracy ram ah Political Party tellovin ram inrelbawlna a kal theilo, Sorkar siamna atan Political Party chu a bulthut leh a ler a ni a, hetihlai hian Political Party ruihchilhna chu hmasawnna daltu lian tak a ni thei thung.

Party ruihchilhna chuan ram mipui huap Sorkar chetvelna ngaihpawimawhna a tinepa, amamawhtute aiin Party mi ngaih- pawimawhna a lian thin a, mipui huapzo Sorkar hmel hmuhtur a vang thin.

Inthlanpui neih ah thlantlinte hi rampum a vote tla atanga chhutin, mipui zatve awrin an vote te an ni hlawm thin a, a bial ang zawng phei chuan Candidate tam deuhna ah chuan mipui zatve aia tlem daih vote hmanga tlingte pawh an awmthei ang, chu chuan mipuiin lungrual taka an duhber te an ni veklo tih a chianga, hetiang a nihlaia, an mahni vote tute lam hawi chauha rorelna leh thuneihna lek an nihzui ngat phei chuan, ram hian hmasawnna tak tak beiseitur a nei tlem ngawt ang.

Party ruihchilhna chuan khawhawi a tizima, mahni hmasialna leh inhaivur tumna bak ngaihtuahna dang zauzawk a neihtir hleithei thinlova, chu chu ramin a tuara, mipui dinhmun a hniamin, an rethei thin.

Hawh u, Political Party tello chuan a awm ngawt theih siloh, Party nilovin, ram an hruaidan leh hruai an tum dante hi ruihchilh zawk ang u, hetiang hun hi kan thlen hma chuan eng hmasawnna tluantling mah hi kan hmu tak takin a rinawmloh.