Lawngtlai khawpui chhung tan Auto Rickshaw permit thar pekchhuahte hnukkir tura Sorkar an nawrna kalzel ah vawiin khan Lawngtlai Auto Rickshaw Owners Association chuan DC Office complex a Office hrang hrangte pisa kaitur an dan bakah a ni thum nan DTO Office an dang bawk.
Lawngtlai Auto Rickshaw Owners Association te hian District Transport Officer Office a thawkte chu nithum an dang tawh a, vawiin atang khan Lawngtlai DC Office bak ah a chhehvel a Office dang, DRDA, Taxation, District Court leh BDO Office a thawktute pisa kaitur an dang tan a, boruak duhawmloh thleng a awmlo.
Vawiin khan Lawngtlai DTO, Pi B.Malsawmtluangi chuan Director, Transport Department hova meeting thuchhuak chu Auto Rickshaw Owners Association hruaitute hi a hrilh a, Director hova meeting chuan Stand chungchang ah Stand siamtheitu chu LADC a nih thu an sawi a, State Transport Authority in permit a pek te chu lei leh hralh phal a nilova, a hria chuan DTO emaw MVI ah report a, cancel tura hmalak nghal tur a nih thu te, Permit chu STA in dan ang thlap a a pek a nih thute tarlan a ni a, Lawngtlai Auto Rickshaw Owners Association te lungawilohna chu STA in a hriat tawh thu leh STA Member te chu chawpchilh taka inkohkhawm maitheih a nihloh vangin remchang hmasaber ah ngaihtuah a nih tur thu te sawilan a ni bawk.
Hetihlai hian Lawngtlai Auto Rickshaw Owners Association hruaitute chuan permit thar pekchhuah hnuhlet chu an duhber a nih thu an sawi nawn a, sawrkar an nawrna chu kaltlangpui zel an tum thu an sawi.
Tags
News