Vawiin Ni 14.10.2022 hian Mizoram Journalist Association, Lawngtlai District te chuan Mizoram Public Service Commission hnuaia Combined Examination a buatsaih ah Lawngtlai District atangin Mizoram Information Service a inziak tling Zonunchama Ralte, Lawngtlai-III leh David A.Lalhmingchhuana, Lawngtlai Council Veng te chawimawina hun Lawngtlai Press Club ah an hmang.
He hun hi Lawngtlai District MJA Vice President Pu Elvis Lalthangzuala'n kaihhruaiin a vawikhatna atan MJA Lawngtlai District ten MIS tling thar te lawmpuina hun an buatsaih thu a sawi a. Tling tharte chu mahni hna a rinawm taka thawk tura chahin Pathian hnenah hun hlan tawngtai a nei
Pu Lalngheta Ralte, MJA President chuan,Lawngtlai District in Combined Service Exam atanga MIS tling thar pahnih kan nei thei hi lawmawm kan ti hle a. He hna hi hna zahawm leh hnathawh nuam tak a ni, a ti a. MIS te leh MJA te hi hnathawh inang kan nih avangin kawng engkim ah thawhhona tha tak kan neih a ngai a. Chuvangin, tuna MIS a tling thar te hi khawi hmunah pawh awm ula, MJA te nen thawhhona tha tak hnuaiah mipui rawngbawl thin Turin a chah bawk ani.
Lawngtlai District Information & Public Relation Officer Pu C.Lalhruaitluanga chuan, MPSC in combined exam a buatsaih ah Lawngtlai District atanga MIS tling thar an awm chu lawmawm a tih thu a sawi a. Hei hian thangthar lehkha thiam tak tak te tan chona duhawm tak a nih a rih thu a sawi a. Civil service ah hian hna sang bik engmah a awm lova, kan hna tlin taka kan thawh a, phur taka kan thawh hian hlawhtlinna chu kan chang mai thin a. Chuvangin, tuna MIS tling thar pahnih kan chawimawi mek te hian mahni hna chu rinawm taka thawk a. Sorkar thu pawimawh tak tak te, a hun taka mipuite hrilh hi kan hna anih dawn avangin inthlahdah lova rinawm taka kan thawh a ngai a ni, a ti a. Lawngtlai District MJA ten hetianga MIS tling thar te chawimawina chang an hria hi a lawmawm hle a. Kan cadre aiawh pawhin lawmthu ka sawi bawk a. Hetianga mi hlawhtling te chawimawi tur an awm zel theihna tur pawh a tan kan lak a ngai hle a. MJA te'n an thil tih hi a ropui mai ni lovin, midangte cho chhuahna ropui tak anih ngei ka beisei ani,a ti bawk.
Hemi hnu hian MIS a tling thar Zonunchama Ralte leh David A Lalhmingthanga te pawhin lawmthu an sawi bawk a. MJA Lawnngtlai District aiawhin Pu ZD.Dengngura leh Pu H Lalrinmawia ten lawmpuina thuziak an hlan bawk ani