PRESS RELEASE
YOUTH FOR ENVIRONMENT JUSTICE MIZORAM
19th September 2022
Youth for Environment Justice Mizoram (YEJM) chuan Mizoram chhunga hmasawnna hnathawh vanga environment dan bawhchhiatna kan la dodal zel dawn a. Kan environment humhim turin kan tih theih zawng zawng kan ti zel ang a. Heihi kan ram a ni a. Hei lo hi ram dang kan neih loh avangin kan environment humhim tur hian eng pawh kan huam a ni.
National Highway & Infrastructure Development Corporation Limited (NHIDCL) kawng laihna hmun heng:-
i) NH-06 Seling to Zokhawthar.
ii) NH-102B Keifang to Manipur.
iii) NH-302Lunglei to Tlabung.
iv) NH-54 Aizawl to Tuipang
ah te ram leilung fa leh kan environment zahna chhete mah nei lo a, dan loa an kawng laih vung an paihin kan thing leh mau, kan ramhmul leh hnim chhiarsen loh an chhilh a, a hmuna nungcha cheng an chimit vek a. An kawng laihna hmun a piangah kan luikawr leh luite (seasonal leh perennial river) 99% an chhilh bawk a ni. An leivung paih chu ruah rawn surin chirhdiakah a chang a, kan luipui (major river) zawng zawngah chirhdiak chu a luang lut a, luia nungchate tan dam khawchhuah ngaihna a awm lo a. Mihring tan pawh ei in tlak a ni lo a, lo leh huan neitu tam tak eizawnna a chim chhe bawk a ni.
Hetianga ram leilung fate leh kan nunna bulpui, environment zah loa an suamsam vang hian, Ni 27, May 2022-ah Principal Chief Conservator of Forest (PCCF), Department of Environment Forest & Climate Change (EF&CC) hnenah environment humhalhna dan leh hrai zawng zawng an zawm hma chuan stay order pe tura ngenna kan theh lut a. Stay order pek a nih hma chuan EF&CC office kawtah silent strike kan nei nghal a ni.
Kan ngenna ngai pawimawhin Ni 30, May 2022 hian PCCF chuan a hnuaia Divisional Forest Officer (DFO) Aizawl / Champhai / Lunglei / Thenzawl / Tlabung leh District Council Conservator of Forests (LADC / MADC) te hnenah heng kawng laih mek hian dan a palzut em tih enfiah a, chutianga dan bawhchhiatna a awm chuan hna kal lai ti tawp nghal turin thupek a chhuah a ni (vide letter No.B.22019/18/2022-FC/PCCF/Pt ni 30/05/2022).
Hetianga Department of Environment Forest & Climate Change-te’na dan anga hma an lakna hi lawmawm kan ti hle a ni. Chutihrualin NHIDCL hnuaia kawng laitute’na kan ram hmasawnna tura hna an thawhnaah hian dan an bawhchhiat nasat em avangin hmasawnna khingbai tak min hnutchhiah tur leh, kan ram leilung thing leh mau nungcha leh luite hi hmasawnna umna avanga dah kham an ni ta mai hi a rilru natthlak a, a dawn tawithlak kan ti a ni. Ram leilung fate ngeiin hmasawnna kan duhna vanga dan bawhchhiatna nasa tak thleng mek kan palzam mai hian, kan tui tlan a tih chhiat a, kan ram ngaw leh nungchate a tih chereu hian ram leh hnam pawi a sawi a, min thlahtute’n he kan ram neih chhun an lo humhalh a, an thisen lo hlantute pawi pawh nasa takin a sawi a ni.
Kan nun khawchhuahna, environment humhalh hian tlai luat a nei lo a. Eng lai pawhin, engtik hun leh khawi hmunah pawh mahni ram leilung leh a hausakna humhalh hi mitin koa innghat a ni. Hmasawnna kan duh theuh a. Environment dan leh hrai zawm chungin kawng a laih theih a, hmasawnna dang pawh a thawh theih tih hi kan hre chiang a. Nawmsak kan duh luat vanga kan chhia leh tha hriatnate phum boa a awm hi kan phal ve lo a ni.
Kan thlahtu he ram lo luah hmasatute thlarau kan zah a, kan ram leilung tihchhiat mek hi kan hua a, tihchhiat belh zel hi kan phal ve lo. Keimahni leh kan tuchhuan lo la awm zel turte tan he kan ram neihchhun hi chenna tlaka humhim turin kan thisen far tawp thlengin kan bei dawn a ni.
(LALRINFELA)
Spokesperson
YEJM