East MLA hovin, Pressure Cooker sem ani.

   

     Mizoram Sawrkar Environment, Forests & Climate Change (EF&CC) Department hnuaia Chhimtuipui Wildlife Division, Lawngtlaiin ram humhalh lai an enkawl pahnih - Ngengpui Wildlife Sanctuary leh Phawngpui National Park chhehvel khua (fringe village)-a chhungkaw khawsak harsa thlan chhuahte hnena pressure cooker sem tur chu tukin zingkar khan Lawngtlai East Bialtu MLA, Agriculture Development Board Vice Chairman Pu H. Biakzaua chuan Lawngtlai College Venga EF&CC office complex aṭangin a vai liam.

    Pressure cooker sem chhuahna hun buatsaihah Khuallian Pu H. Biakzaua chuan khawvel pumin leilung leh chhevel boruak (environment) venhim leh siam ṭhat lam a buaipui tih sawiin, ramngaw chereu zel chuan a chhe zawnga nghawng tam tak a neih vanga buaipui ngai a nih thu a sawi a. Mihringte tana boruak vawng daitu leh boruak ṭha siamtu, tui hna siamtu, nungchate tana chenna leh ei tur petu thing leh mau leh ramngaw chu tichereu lo va, humhalh leh siam belh zel a ṭul tak zet tih a sawi. EF&CC Department-in ramngaw humhalh tura a thua mipui zirtir mai duh tawk lo va, ei rawngbawlna tur tuahthing atana ngawa innghat mipui khawsak harsa zawkte ṭanpui paha ngaw an rinchhanna tiziaawm tura hma lak nachang an hria chu remhria a tih thu sawiin, pressure cooker dawngtute pawh an dawn chhan hre chiang a, ramngaw humhalh kawnga ke pen turin a chah a ni.

    He huna khual zahawm, Lai Autonomous District Council -a Chief Executive Member Pu V. Zirsanga pawhin thu sawiin, thingtlang chhungkaw khawsak harsa zawkte tana hun rei lo zawk chhunga chaw tui zawka chhum hmin theihna pressure cooker a thlawna sem a ni chu lawmawm a tih thu a sawi a. Sem chhan tihlawhtling turin ramngaw humhalh leh siam belh  lamah thlen chin aṭanga hmasawn zel turin kal khawmte leh beneficiary-te chu a sawm a ni.

    Hemi hnu hian Khuallian chuan pressure cooker sem tur, a semna tur  motor lianin a phurh chu a vai liam a. A hmunah hian Lawngtlai College Veng aṭanga cooker dawng tura thlante hnenah Khuallian, khual zahawm leh official dangte'n pressure cooker hi an sem nghal bawk.

    Tun ṭuma EF&CC-in thingtuah mamawh zat tihniam theitu pressure cooker an sem hi Compensatory Afforestation Fund Management and Planning Authority (CAMPA) hnuaia Annual Plan of Operation 2020-21 aṭanga sum dawn aṭanga ruahman a ni a. Ngengpui Wildlife Sanctuary chhehvel khaw 13-a chhungkaw 620 leh Phawngpui National Park chhehvel khaw 11-a chhungkaw 580, an zavaiin chhungkaw 1,200 hnenah pressure cooker pahnih ṭheuh - litre 3 leh litre 5 sem turin an ruahman a. He'ng khaw tin aṭanga a dawng thei tur beneficiary hi mipui awm zat aṭanga chhutin sem rual a ni.