Biakzaua chuan Mizoram Sawrkarin tih tum hmachhawp a neihte tam tak a tihlawhtling tawh tih sawiin, tunah chhungkaw eizawnna ngelnghet tinzawn -a Sawrkar flagship programme SEDP kalpui tura bul tan chhoh a ni ta chu lawmawm a tih thu a sawi a. Lawngtlai District tana hawnna huna mipui thahnem tak an tel chu ropui leh phurawm a tih thu a sawi. Sawrkar Laipui atanga sum dawn tur, dawn tak loh, a hloh cheng vaibelchhe 3,000 vel zet a awm laiin, COVID-19 hri leng avang te, lirnghing leh khuarel chhiatna avang te, ramri buai avang te, raltlan buaipuinaah te leh ASF avang te'n ruahman lawk lohva sum hman tulna Sawrkarin a hmachhawn a, chuti chung chuan hmasawnna hna thawh a chawl chuang lo tih sawiin, Family Oriented SEDP pawh a tira ruahman angin a tahtawla kalpui chhoh zel tum a ni, a ti. Family Oriented SEDP chu Mizoram pumah beneficiary mi 60,000 hnenah 1st instalment pe chhuak phawt tura ruahman a nih thu sawiin, assembly constituency tinah beneficiary 1,500 theuh an awm tih a sawi a. Lawngtlai District chhunga SEDP beneficiary-te chu tih tak takna nena bul tan tur leh a hlawhtlin ngei theih nana theihtawp chhuah turin a chah.
Pu H. Biakzaua hian Village Level SEDP Committee te inrelbawlna tur chu VLC thlan chhuah 9 hnenah cheque-in a hlan nghal a. VLC tin hian beneficiary an ngah dan azirin beneficiary pakhatah Rs 300/- zel admin cost hi an dawng vek dawn a. Khuallianin a sem bak hi DC Office atangin VLC tinin an lak theih turin ruahmanna siam a ni.
He hunah hian Lawngtlai DC, District Level SEDP Committee Chairman Pu Amol Srivastava chuan SEDP thil tum, atam thei ang ber dinhmun tha zawka hlan kai tih a hlawhtlin nana thawh hopuiah kal khawmte chu sawm.
District Level SEDP Committee Member Secretary Pi Marilyn Rualzakhumthangi report-a tarlan a nih danin, Lawngtlai District chhungah khaw 187 a
awm a, beneficiary 4,500 an awm a ni.
Tags
News