Vawiin khan Lawngtlai DC, Pu Amol Srivastava chuan Lawngtlai khawpui chhunga sikul thenkhat tlawhin, an dinhmun a enfiah.
DC hi Lawngtlai District Education Officer & Samagra Shiksha District Project Coordinator Pi R. Lalnunthari, Lai Autonomous District Council (LADC)-a Elementary Education Officer (M/S) Pu F. Lalhmachhuana, Assistant Elementary Education Officer (P/S) Pu B. Lalnunzawmpuia, Hindi Education Officer Pu Alex Lalzawmpuia leh Education Department official thenkhatte'n an tawiawm.
School an tlawh te hi Govt Region Higher Secondary School, Govt Region High School, Govt Model English School, Govt Southern Public High School, College Veng Primary School-I, Govt Southern Standard Middle School, Govt College Veng High School leh Chandmary Primary School-I te a ni.
DC hian sikul a tlawhte hi an dinhmun leh harsatna te zawtin, zirtirtute'n an mamawhte a hnenah hian an lo thlen a, Bawrhsap chuan a theih ang anga hmalakpui a tum thu a sawi. Sikul a tlawhnaah hian chawchhun (midday meal) an chhum te pawh endikin, a thianghlim leh thianghlim loh hriat nan a ei ve nghal bawk a. Sikul a tlawh rual hian District Education Office leh Samagra Shiksha District Project Office te pawh a tlawh tel nghal bawk.