 |
| The Lawngtlai Post |
Kumin May 30 zana Bazar Veng leh Chandmary a Leiminna lai chu vawiin tlai khan Chief Minister Pu Lalduhoma'n a hmunah enin, hmalakzui dantur an thlir.
Chief Minister hi Lawngtlai DC, Pu Donny Lalruatsanga'n Leiminna laiah lo dawngsawngin, Adviser to Chief Minister Dr.Lorrain Lalpekliana Chinzah leh Lawngtlai DC Pu Donny Lalruatsanga ten chhiatna thlendan kimchang Chief Minister hi an hrilh a, chhiatna thlengah Sorkar leh Tlawmngaipawl te tanrualna thatzia te, chhanchhuah leh chhawmdawlna pawh theihtawp chhuaha neih a nih thute, Sorkar anga tihtheih ang ang tanpuina leh chhawmdawlna lam hawi pawh buaipui a nih thute Chief Minister hi an hrilh.
Chief Minister Pu Lalduhoma chuan chhiat tawkte a tawrhpui thu a sawia, chhiatna vanga In leh bungrua chhiate hlut zawng mumaltaka chhutchhuaka, a ranglama report siam nise, Central lamah thehlutin, amah pawn a bawhzuina ah theihtawp a lo chhuahtur thu a sawi a, Inchim senghawi kimloh pawh a theih anga senghawi dan ngaihtuah tha a tih thu Chief Minister hian a sawilang tel bawk.
May 30 zana Bazar Veng leh Chandmary a leimin vang khan Inrellai pahnih telin RCC Building paruk leh Assam Type pakhat a chhia.