Agriculture Complex-a vaimim chi sem chhuahna hun buatsaihah Pu H. Biakzaua chuan COVID-19 vangin SEDP chu ruahman anga kalpui theih lohvin rei tak a awm tih sawiin, kuminah a nawlpui anga kalpui a, trade hrang hrangah nasa taka hma lak tum a nih thu a sawiin, Kumin hian chhungkaw sing ruk aia tlem lo hnenah SEDP pek chhuah tum a ni, a ti.
Agriculture chu Mizoram mipui tam zawk innghahna a nih avangin sawrkarin a ngai pawimawh hle tih sawiin, Pu H. Biakzaua chuan Chief Minister leh Agriculture Minister te hma laknain Agriculture Department-ah SEDP sum pawh tam zawk dah a nih thu a sawi a. Vaimim chu mihring ei atan bakah ran chaw atan pawh hmanna tur tam tak awm, kawng hrang hranga sawngbawl theih a nih thu sawiin, Lawngtlai District chhunga vaimim chîng tura thlan chhuahte chu District intodelh ni tura tan la turin a chah.
SEDP hnuaia vaimim chîng turte hian vaimim chi hi kg 20 zel an dawng dawn a. A hmun hectare 1-a zauva chîn tur a ni. Vaimim chi bakah hian silpauline te, lei tha te, thlai venhimna tur hlo leh a kahna hmanrua te leh a chîn atanga a seng thlenga senso phuhrukna tur sum fai te pawh an dawng dawn a ni.