April ni 18 - 29, 2022 inkar chhunga India ram puma block level health mela buatsaih tura ruahmanna bawhzui dan tur ngaihtuahin nimin khan Lawngtlai District Level Committee chu an Chairman, Lawngtlai DC, Dr Andrew H. Vanlaldika hovin a office chamber-ah an thu khawm.
Ruahman lawk dan chuan health mela-ah hian mipui tan inentirna leh damdawi man a thlawn veka kalpui tur a ni a. Stall hrang hrang - inkai chhawn theih loh natna (non-communicable disease) lam te, zuk leh hmuam kaihhnawih (tobacco) lam te, rilru hriselna (mental health) lam te, HIV/AIDS kaihhnawih (MSACS) lam te, hri danna pekna (vaccination) hmun te buatsaih a ni ang a, Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihna te pawh kalpui tum a ni a. Specialist leh Doctor thiam tak tak chu mipui rawn theih turin clinic hawngin an thu dawn bawk a ni.
Block level health mela neih turah hian Lawngtlai Block atan chuan April ni 18, 2022 -ah Government Region Higher Secondary School-ah mela hi buatsaih a ni dawn a. Zing dar 9:30-ah hawnna hun hmangin, nilengin kalpui a ni dawn a ni.
April ni 21 (Ningani)-ah Chawngte Block tan Chawngte-ah, April ni 22 (Zirtawpni)-ah Bungtlang 'S' Block tan Bungtlang 'S'-ah leh April ni 26 (Thawhlehni)-ah Sangau Block tan Sangau-ah te health mela hi buatsaih tura ruahman a ni.