Inrinni February 5, 2022 khan Pu HC. Vanlalruatpuia, Central YLA President chuan YLA Vartekkai Branch-in YLA Rûn an sak chu Vartekkai khuaah a hawng.
Vartekkai YLA Rûn hawnna ah hian Lawngtlai atangin Central YLA President Pu HC. Vanlalruatpuia hovin General Secretary Pu JH. Lalrindika bakah Central Executive Committee member pariat an tel a. YLA Lungtian Group leh Rawlbuk Branch atangin hruaitu thenkhat an tel bawk.
Central YLA President Pu HC. Vanlalruatpuia chuan YLA hian kan dinchhan tihlawhtling turin mi hausa leh rethei tumah thliar bîk nei lovin kawng hrang hrangah hma a la thin a. Chutiang ang chu hmun hrang hranga YLA member-te hian nunpui zel tur kan ni tih sawiin YLA Vartekkai Branch te'n sum tlemte hmanga YLA Rûn tha tak an sa puitling thei chuan hruaitute leh member te thawhhona thatzia a tarlang ani ati.
Vartekkai Branch YLA Rûn sakna atan hian Bialtu MLA Pu H. Biakzaua'n MLA Fund atangin Rs.1,00,000 a pek bakah Bialtu MDC Pu Sanghuliana Mualchin hnen atangin Rs.50,000 an dawng bawk a, heng bakah hian Vartekkai V.C te'n Rs.20,000 thawhsakin a bak hi Branch YLA sum leh hnatlang tha engngemawzat senga sak puitlin a ni.
Vartekkai Branch YLA te hnenah hian Central YLA hmingin lawmpuina/tanpuina Rs.15,000 Central YLA hruaituten an hlan.