Kum tin October ni 10 hi World Mental Health Day atan hman thin niin, kumin hian Pathianni a nih avangin nimin khan hman a ni a. Kumin thupui atan "Mental Health in an Unequal World" tih hman a ni.
District Medical Superintendent Dr Zothanpari Chhakchhuak chuan zir chianna atangin mi 7 kal khawm zingah mi pakhat zelin rilru lama harsatna nei nia chhut a nih thu sawiin, rilru lam harsatna neih chu thil zahthlak a ni lova, natna dang ang bawka enkawl dam theih a ni, a ti a. Ni tin nunah rilru hriselna ngaih pawimawh a tul thu leh rilru hrisel nei tura taksa vawn uluk a tul thu sawiin, rilru lama harsatna nei an hriat chuan mi thiamte pan vat tura thurawn pe turin kal khawmte chu a chah a ni.
Lawngtlai District Mental Health Programme hi October, 2016 khan hmantan a ni a. A din tirh atanga September, 2021 thleng khan damlo mi 2,467 an enkawl tawh a ni.
Day puala hunhman hi District Mental Health Programme in-charge Medical Officer Dr Richard Lalrinmawia Ralte chuan a kaihruai a. DMHP-a Psychiatric Social Worker Pi Vanlalruati'n report a pe bawk.