Covid 19 vanga kan tawrhna hi a nasa viau tawh a, a pawisa zawnga chantir vek theih nilemlo, hna khaihlak nasa lutuk ringawt pawh hi chhiatpui tham a tling a, mihtiamte hian he natna hi a hlauhawmloh thu an la sawi lova, a hlauhawmdan a la pangngai reng tih hriat a tha a, Covid 19 laka invenna thaber chu Vaccine lak hi a ni.
Mizoram Sorkar chuan duh anga he natna kai hriattheihnatur test na hmanraw tha a nei mumallova, sawisel luai luaina hnuaiah Rapid Antigen Test chu hman chhunzawmzel a nih laiin, Test erawh a hma anga chakin kalpui a ni tawhlova, hetiang na na na chu hrikai hmuhchhuah pawh a tlahniamlo thei lo. Inkhuahkhrihna tamtak chu hlih a nih bakah, a dangpawh, a hming chauhva kalpui a ni chho tawh a, mipui kan zalen a, hri kan hlau a ni tih a la lanna chu Mask kan vuah hi a ni deuh tawh mai.
Covid 19 hian a chakna a la hloh lova, a hlauhawmdan a la pangngai reng a, tun ang zela inthlah zalen hi kan hmang thiamlo a nih chuan, a hma aia nasa zawkin he hripui hian min nuai lovang tih pawh a sawitheih loh.
Mitinin mahni thiamna leh chhia leh tha hriatna hmanga inven chu hri laka fihlim tura kan tihtheih sangber a ni tih hi kan hriatsa, kan hriat nawn ngai a ni awm e.