Kumin May leh June hian buhfai hi a thlawnin sem leh tur niin, DCSO Lawngtlai hnuaiah May thla chhung hian Buhfai Qntl 2425.15 a thlawnin sem leh mek a ni.
AAY leh PHH member ten mi pakhat zelah kg 5 a thlawnin an dawng mek a, Epos machine hmangin Online chauhin buhfai hi pek chhuah theih a ni.
Nikum 2020 khan Buhfai qntl -24448.60, Dal – qntl 332.00 Quintals leh Chana qntl -531.11 sem chhuah a lo ni tawh a, DCSO Pu B.Liansiama chuan Lawngtlai District ah internet signal a mumalloh avangin online hmanga buhfai sem hi Retailer tam takin an ti thei lo niin a sawi a, tunah hian veng tam takah chuan buhfai awm mahse online a sem a ngaih avangin buhfai hi an sem thei lo thung a ni.
Supply Department hian a taka buhfai an kal kualtir ang chiah hian Online hmangin kal kualtir vek a ni a. FCI Godown atangin PDC Lawngtlai ah, PDC Lawngtlai atangin Godown hrang hrangah, Godown atangin Retailer ah, Retailer te atangin mipuite hnenah a takin Online in kal kualtir a ni. A tawpa awm retailer te hian Online-in buhfai ePoS machine ah lo dawngin, an khawl hmangin buhfai an sem thin a. Mipuite’n kut zungthla nem hmangin buhfai an la thei dawn a ni.