Nimin Zirtawpni khan Lawngtlai District a tlawmngaipawl lianber Young Lai Association Special Conference, neih a ni a, hruaitu inthlanna neih a nih hma chuan hruaitu ngaiten Central YLA hruai chhunzawm se an ti
YLA rorelna sâng ber General Conference neih theih a nih loh avangin YLA Special Conference chu Chandmary Inpui, Lawngtlai-ah neih a ni a, hripui leng vanga YLA General Conference neih theih a nih loh avanga neih, Special Conference hi Central YLA President Pu HC. Vanlalruatpuia'n kaihruaiin LIKBK Pastor Rev. V. Suikharliana'n hunserh a hmang a. Central YLA General Secretary Pu JH. Lalrindika hnen atangin Central YLA hmalakna report ngaihthlak a nih bakah sum vawngtute atangin sum dinhmun ngaihthlak a ni bawk.
Special Conference-ah hian Covid 19 vanga Sawrkarin inkiahhruaina a siam zulzuiin palai kal tur pawh tih tlem niin Sub-HQ, Group YLA, Joint YLA leh Branch aiawh mi tlemte chauh palai tura ruahman a ni a, rorel palai hi mi 117 an ni.
Special Conference hian Hripui leng vanga Central YLA hruaitu thar thlan theih a nih loh avangin tuna hruaitu term hi General Conference-a Central YLA hruaitu thar thlan a nih hma atan a pawtsei a, hruaitu term pawh term thar anga chhiar ni se tih niin General Conference neih hun atan March 2022 ni se tih a ni a, Special Conference hian Nomination Committee member tur mi panga (5) thlan thar an ni bawk.
Central YLA President Pu HC Vanlalruatpuia chuan Covid 19 hripui thawhhnihna chu a hma aia nasa zawka do a tul thu sawiin, YLA ten theihtawp chhuaha tan an lakloh chuan, hripui hian chhiatna nasa zawk a thlen a hlauhthawnawm tih sawiin, Branch Group leh Joint YLA te chu theihtawp chhuah a hridona ah tan la thar turin a chah a, Myanmar ram buaina vanga raltlan te tuamhlawm kawng ah YLA chuan thapui a chhuah zel dawn a ni a ti bawk.
Central YLA General Secretary report-a a lan danin Central YLA hnuaiah hian Sub-Headquarters pasarih awmin Branch 112 an awm mek a ni.
Tags
News