LADC Budget Session ah, Zirtirtu semrual tuma hmalak mek a nih thu sawilan a ni a, he thil hi a thu ringawt ah a ral mai ang tihhlauhthawnna pawh a awmin a hriat a, a hlawhtlin ngei duhna vang a hetiang ngaihdan hi awm a nih a rinawm a, Sorkar tan pawh huaisen ngaitak a ni dawn tih a chiangin a hriat a ni.
Thuhlawm pakhat, hmasawnna tur a rahbi pawimawh, kan inzirtir thin ah chuan Zirna ngaihpawimawh hi a langpha hial awm e. Hetihlai hian LADC hnuaia Zirna In ah te Zirtirtu inkhairuallo a tam thu Session ah pawh sawilan a nih kha.
Executive Member Primary Education enkawltu chuan, Zirtirtu semrual tur a hmalakna ah hian tanrual a ngaih tur thu a sawilawk a, ram tana thatur ah chuan eptu an ni emaw, ruling an ni emaw, thiltithei deuh an ni emaw, Executive Member in tanrual a ngaihtur thu a sawi hi tanrualpui a, sorkar hmalakna lo tawiawm hi an tihtur a ni ang.
Council hian mithiam leh rintlak chherchhuak tura bul a tanna Zirna In ah hmelthar lang khawp a bul a tan a tul a, hetianga hmalathei tur chuan tanrualna a ngaihzia chu sawitam ngailovin a chiang a, harsatna bik neite dinhmun chu Sorkar hian a hrethiam ngei ngei ang tih ring ila, hemipiahlam ah semrual hleihtheihloh khawp emaw, Sorkar hmalakna tihhlawhchham khawp a, hnathawktu zawk an awm chuan, Sorkar hian a tihtur a hai in a rinawmloh a, awmzeneiin, tute emaw hremna tur lam hawi nilo, Zirna tha duh vanga hmalakna kalpui tur hi thlawp tlat a tul awm e.