Nimin khan ANM School, Lawngtlai chuan an School Auditorium-ah 4th batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) an buatsaih.
He hun hi Lawngtlai DRDA Project Director/Additional DC Pi Marilyn Rualzakhumthangi'n hmanpuiin, ANM School Lawngtlai chu an result leh sikul inenkawlnaah mittlung, chhuanawm leh District timawitu nia a hriat thu sawiin, Principal leh thawktute inpeknaah a fak a. Nurse-te pawimawhna leh an rawngbawlna hlutzia tar langin, zirlaite chu thahnem ngai taka an zirlai zir tur te, sikul inrelbawlna zawm thiam a, zirtirtute thu awih tur leh an zir chhuah hunah pawh nurse rawngbawl hna zahawmna humhimtu leh vawng nungtu nih tum tlat turin a chah.
Christian Hospital Lawngtlaia Assistant Nursing Superintendent Pi Lalhlimpuii Hrahsel chuan 4th batch zirlai tharte chu lukhum khumtirin, khawnvar a chhittir a; zirlai tharte chuan thu tiam an sawi rual nghal bawk. Pi Lalhlimpuii Hrahsel chuan lukhum chuan mi dang tanpui tura mawhphurhna a ken tel thu leh a rawng var chuan thianghlimna a entir thu sawiin, khawnvar hal chu mi dang tana eng chhuak tur te, inchhem alh tawn tur te leh thiamna leh mawhphurhna inhlan chhawng tura Florence Nightingale-i khawnvar chhit chhunzawm zelna ani, ati.
He hunah hian zirlai nu leh pa te, health department-a thawkte, sawrkar officer-te, tlawmngai pawl ai awhte leh sawm bik eng emaw zat an tel .