Lawngtlai atanga chhimchhak lam hawia Myanmar ram pawh tura kawngpui sial mek hi Myanmar ramri thlengin kilometres 87.180 niin, kawng laih tur chin chu laih zawh vek tawh niin, blacktop hna pawh thawh zawh a ni tawh a, he kawngah hian lei (bridge) dawh ngai hmun 8-ah awmin, heng leite hi tunlai hian dawh mek niin, chawhrualin Lei pariat te hi 75% zawhfel a ni tawh.
He kawng viltu Mizoram PWD report a a landanin, Lei pariat dawhna tur hian cheng Vaibelchhia 34.85 ruahman niin, heng Lei panga, Ngengpui, Lunghauka, Khawrawp, Hmawngbu, Zochate Lei te chu 90% chuang thawhzawh tawh niin, Khawrawp Lei phei chu 96.76% zawhfel a ni tawh a, Bawklawk Lei chu 89.92% thawhzawh tawh niin, Zochate Lei chu 34.33% thawh tawh a ni a, Ruankhum Lei dawh hna erawh bultan a la nilo.
KMMTTP kawngpuiin Myanmar ram a pawhna, Zochachhuah piah lawk atangin Myanmar ram chhung lamah pawh kawngpui hi eng emaw chen chu laih a ni tawh bawk. He kawngpui hi hawn a nih hma atangin a bikin Lawngtlai District khawthlang lam khuaten an hmang tangkaiin, inkalpawh nan leh bungraw thiarvel nan he kawngpui hi an hmang nasa hle a ni.
Myanmar nena insumdawn tawnna KMMTTP kawngpui chhunzawmna, Zorinpui atanga Myanmar ram chhung Paletwa thleng hi 2-lane-in km 109.200 sial tur a ni a. A hna hi Ministry of External Affairs enkawlna hnuaiah Engineering Projects (India) Ltd leh C&C Construction Ltd ten thawk mekin, he kawng hian Myanmar ram chhunga khaw 24 a tan tlang dawn a. A kawng sei zawng pumpui km 109.200 atangin a hmun sam fai tawh km 95, a ruangam (design) ruahman tawh km 45, lei laih (formation cutting) tawh chin km 38 leh lirtheiin a zawh theih tura subgrade phah tawh km 14.860 a awm a ni.