Rajya Sabha MP Pu K.Vanlalvena chuan nimin khan Vice President, Rajya Sabha Chairman ni bawk Pu M.Venkaiah Naidu chu a chenna hmunah kawmin Myanmar laka sawrkar laipui policy chu ennawn tula a hriat thu an thlen.
Pu K. Vanlalvena chuan Myanmar rama Democracy tundin tuma hmalatute tawrhna nasa tak thleng mêk chungchang sawiin Myanmar ram buaina avanga sipai kut tuara thi leh hliam tam tak an awm tawh thu leh, mi tam tak tanina khung an nih mek thute, thi leh hliam zat dik tak hriat theih a nih loh thu leh an la pun belh zel dawn nia a lan thute Vice President hi a hrilh a. Myanmar sipai leh police te zinga mi eng emaw zat chuan Myanmar mipuite chunga kutthlak an duh loh avangin an ralthuamte pelutin in nunau midang eng emaw zat te nen inhumhimna zawngin Mizoramah an tlan lut tawh a ti a, Myanmar atanga raltlan lo lutte chhawmdawlna tur ngaihtuah a tul thu pawh thlenin Myanmar mipuite chunga tawrhna titawp tura a tul dan anga hma la turin Vice President chu a ngen bawk a ni.
Rajya Sabha MP leh amah tawiawmtu MNF Adviser Pu Rosangzuala te chuan India independent hnuah UPSC Member ah Mizoram mi an la awm ngai loh avangin dah ve tura hma lakpui turin Vice President chu an ngen a. Mizoram chu All India Civil Service ah AGMUT cadre hnuaia a la awm chu a hun tawh lovin Mizoram Cadre hran siam a hun tawh tih Vice President hnenah hian an thlen bawk.