Agricultural Technology Management Agency (ATMA), Lawngtlai District; State Agricultural Management & Extension Training Institute (SAMETI), Mizoram leh MANAGE Hyderabad te tang ho huaihawta Lawngtlai BNRGSK Hall-a ni 5 chhung awh tur thalai kut hna thawktute tana training buatsaih chu nimin khan Lawngtlai DC, ATMA Governing Board Chairman ni bawk Dr Andrew H. Vanlaldika chuan a hawng.
DC chuan Mizoram kut hna thawktute chu an thatchhe lo va, tunlai thiamna hman tangkai kawngah kan la hnufual deuh avangin a hlawk tur angin an la hlawk lo mai chauh zawk a ni tiin, tun hmaa lo tih than dan sahuai thing vawn tlat lo va, mi thiamte rawn peih leh an thu zawm thiam a pawimawh a ni a ti.
Ni 5 chhung awh tur training hawnna hi Lawngtlai District ATMA Project Director Dr Benjamin Lalduhawma chuan a kaihruai a. Block Technology Manager Pu Lalnunzuala hnen atangin ATMA hma lakna report tawi ngaihthlak a ni a. Lawngtlai District chhunga lo neih leh ran vulh lama ti thate, Self Help Group thawk tha leh Farmer Friend thawk thate hnenah chawimawina thuziak leh tangka fai hlan a ni bawk.
He training hi Skill Training of Rural Youth hnuaia buatsaih niin, tun tumah hian NYK, Lawngtlai District hnuaia thalai kut hna thawkute hnenah Ar vulh dan leh electric hmanga artui awp keu dan zirtir an ni dawn a ni.