India ram state puitlinga Mizoram hlan kai a nih champha phak 34-na, Mizoram State Day vawi 35-na chu Inrinni khan Lawngtlai DC Conference Hall-ah lawm a ni.
Khuallian, Lawngtlai DC, Dr Andrew H. Vanlaldika chuan Lawngtlai District mipuite State Day chibai bukin, state nihna chu harsa taka sual chhuah a nih avangin ngaihlu tur leh state dangte tana state entawn tlaka Mizoram din chhuak tura theih tawp chhuah turin a chah a. Ram hruaitu, sawrkar hna thawk, tlawmngai pawl, kohhran leh mipuite'n ram hmasawn nan mahni hma zawna tih tur theuh hlen chhuahna kawngah theih tawp chhuah tur leh inpumkhatna leh thawh hona tha neih zel tum turin a chah a. Zirna leh faina kawngah tan lak deuh deuh a tul thu uar taka sawiin, khawtlang nun siam tha tur leh mahni intodelh tura tan la turin District mipuite a sawm bawk a ni.
He hunah hian LADC-a CEM, Pu Manghmunga Chinzah pawhin thu sawiin, ram hmasawnna dal thei leh tithuanawp thei, khawtlang nuna siam that ngai awmte chu siam tha a, chak zawka ramin hma a sawn theih nana tan la thar turin kal khawmte chu a fuih bawk.
Lawngtlaia State Day lawmna hi LADC Executive Secretary Pu H. Lalramenga'n kaihruaiin, kum 1986 June ni 30-a MNF leh India sawrkarin Remna Thuthlung an ziah fel hnua kum 1987 February ni 20-a Mizoramin state nihna a neih chho dan a sawi a. Lairam Isua Krista Baptist Kohhran General Secretary Rev. B. Zazawna Lai chuan hunserh a hmang a. Lawngtlai District I&PRO Pu C. Lalhruaitluanga'n lawm thu sawiin hun a khar a ni.