Nimin khan Lawngtlai DC Conference Hall-ah Bawrhsap Dr Andrew H. Vanlaldika hovin Lawngtlaia Republic Day 2021 hman dan tur rel a ni a. State sawrkar leh LADC official-te leh pawl hrang hrang ai awhte an tel.
Chairman Dr Andrew H. Vanlaldika chuan COVID-19 hri leng vangin kum dang angin Republic Day chu hman theih a ni dawn lo tih sawiin, state sawrkarina hman dan tur a ruahman dan a sawi fiah a. COVID-19 laka fimkhurna dan zawm chung a he Ni hmandan tur hi ngaihtuah a ni.
Kumin Republic Day lawmna hi Central YLA Playground-ah zing dar 8:30-ah hman ni se, sikul naupang atanga parade contingent beisei a rem loh avangin guard of honour atan Mizoram Police Armed Contingent beisei an ni.
Swachh Bharat Mission hnuaia Lawngtlai District chhunga faina intihsiaknaa lawmmante chu Republic Day ah hian sem tur a ni a. Lawngtlai khawpui chhunga damdawi in pathum, chhawmdawlna in leh District Jail-ah te Republic Day pual tanpuina thilpek pek leh ni se, tih a ni bawk.
Sawrkarin a ruahman angin sikul naupang leh mipui nawlpui tel lova hun hman a ni dawn a. Mipuiin in lam atanga an lo chhim theih nan cable TV kal tlanga live telecast-a pek chhuah tum a ni.Kum danga tournament buatsaih thin chu buatsaih a rem dawn lo a ni.